PAGBIBIGAY diin ni House prosecutor at Manila Rep. Joel R. Chua na panahon pa upang mabunyag ang katotohanan patungkol sa kontrobersiyal na confidential funds na di-umano’y walang habas na nilustay ng respondent na si Vice President Sara Z. Duterte.

Nakatakdang simulan ng House prosecution panel ang paghaharap ng mga ebidensya kaugnay ng umano’y maling paggamit ng Bise ng ₱612.5 milyon sa confidential funds sa muling pagbubukas ng paglilitis ng Senate impeachment court ngayong Miyerkules (Hulyo 29).

Sinabi ni Chua, ang pangunahing prosecutor na humahawak sa Article I ng impeachment case, na ang mga pagdinig ay magbibigay sa publiko ng pagkakataong makita ang mga ebidensya sa likod ng isa sa mga pangunahing paratang laban kay Duterte.

“Dito lalabas ang katotohanan. Hindi na ito usapin ng mga alegasyon lamang. Ihaharap namin ang mga dokumento, mga saksi, at mga ebidensya sa harap ng impeachment court,” ayon kay Chua.

Sa ilalim ng Article I, inaakusahan si Duterte ng maling paggamit ng ₱612.5 milyon sa confidential funds noong siya ay Bise Presidente at Kalihim ng Edukasyon.

Bukod sa pagiging House prosecutor, si Chua rin ang chairman ng House Committee on Good Government and Public Accountability na nagsagawa ng imbestigasyon noong 2024 hinggil sa paggamit ng confidential funds ni Duterte.

Sa loob ng ilang buwan, nagsagawa ang komite ng sunod-sunod na pampublikong pagdinig upang suriin ang pagpapalabas, pag-withdraw, paggasta, at liquidation ng confidential funds na natanggap ng Office of the Vice President (OVP) at Department of Education (DepEd) noong panahon ni Duterte.

Lumitaw sa imbestigasyon ang mga umano’y iregularidad, kabilang ang mga acknowledgment receipt na may mga pangalan ng sinasabing tumanggap ng pondo, ngunit kalaunan ay napag-alamang marami sa kanila ay walang katugmang birth records o hindi mapatunayan ang kanilang pagkakakilanlan.

Ang mga natuklasan ng komite ang naging isa sa mga pangunahing batayan ng mga reklamong impeachment na inihain laban sa Bise Presidente.

“Nagsagawa kami ng masusing imbestigasyon. Ngayon, ilalatag na namin sa Impeachment Court ang mga ebidensyang aming nakalap, at hahayaan naming ang mga katotohanan ang magsalita,” ani Chua.

Kabilang sa mga unang ihaharap na testigo ng prosekusyon sina dating Land Bank of the Philippines (LandBank) Shaw Boulevard Branch manager Violeta Constantino at dating LandBank Department of Education Branch manager Nenita Camposano.

Inaasahang magbibigay sila ng testimonya hinggil sa proseso ng pagproseso, dokumentasyon, at pag-withdraw ng confidential funds na saklaw ng reklamong impeachment.

Nagpalabas din ng subpoena ang Senate impeachment court kay Marivic Pareja, pinuno ng House Legislative Archives, Museum and Management Service upang iharap ang mga opisyal na rekord ng Kamara na may kaugnayan sa impeachment proceedings.

“Karapat-dapat ang sambayanang Pilipino sa transparency at pananagutan. Sa paglilitis na ito, ang mga katotohanan—hindi pulitika—ang dapat manaig,” ani Chua.

Noong nakaraang linggo, tinapos ng House prosecution panel ang paghaharap ng mga ebidensya kaugnay ng artikulo ng impeachment na tumutukoy sa umano’y mga banta ni Duterte laban kina Pangulong Ferdinand “Bongbong” R. Marcos Jr., Unang Ginang Liza Araneta-Marcos at dating House Speaker Ferdinand Martin G. Romualdez.

Ang muling pagbubukas ng paglilitis ay hudyat ng paglipat ng prosekusyon sa Article I ang sakdal kaugnay ng confidential funds na nag-ugat sa imbestigasyong isinagawa ng Kamara noong 2024 sa pamumuno ni Chua.