NAGHAIN si Senadora Risa Hontiveros ng isang resolusyon na nananawagan sa pamahalaan ng Pilipinas na bumuo ng pambansang estratehiya upang harapin ang mga banta mula sa mga proteksyunistang hakbang ng ibang bansa na maaaring makaapekto sa industriya ng Information Technology and Business Process Management (IT-BPM) sa bansa.

Inihain bilang Senate Resolution No. 95, tugon ito sa “Keep Call Centers in America Act of 2025” (S.2495), isang panukalang batas na nakabinbin sa Senado ng Estados Unidos. Layunin ng naturang batas na limitahan ang mga offshore customer service operations sa pamamagitan ng pag-obliga sa mga kumpanyang Amerikano na isiwalat ang pisikal na lokasyon ng kanilang mga ahente, pagbawal sa ilang paggamit ng artificial intelligence sa labas ng U.S., at ibalik sa Amerika ang ilang serbisyo para sa mga kustomer. Kabilang din sa panukala ang pagdiskwalipika sa mga kumpanyang hindi susunod sa mga patakaran mula sa pagtanggap ng mga pondo o pautang mula sa pamahalaan ng U.S.

Isa ang sektor ng IT-BPM sa Pilipinas sa pinakamalalaking tagapag-ambag sa ekonomiya ng bansa, na may inaasahang kita na $38 bilyon noong 2024 at tinatayang 1.82 milyong manggagawa. Sa 2028, inaasahang aabot sa 2.5 milyon ang kabuuang empleyo. Tinatayang 70 porsyento ng mga kliyente ng industriya ay mula sa Estados Unidos.

Sa resolusyon, binigyang-diin na bagama’t ilang beses nang nagkaroon ng kahalintulad na anti-offshoring bills sa nakaraan, posibleng mas malaki ngayon ang tiyansa na maisabatas ang ganitong panukala dahil sa kasalukuyang political at legislative na klima sa Amerika. Kabilang sa mga salik ay ang mas pinaigting na pagtutok sa data privacy, pagpapanatili ng lokal na trabaho, at regulasyon ng AI.

Upang matugunan ang mga panganib, iminungkahi sa resolusyon na agad na bumuo at ipatupad ng ehekutibo ang isang pambansang estratehiya na may mga sumusunod na elemento:

Una, ang pagbuo ng Office of the Trade Representative for Services. Ang ahensyang ito ang magiging responsable sa pakikipagnegosasyon ng mga kasunduan ukol sa serbisyo, pagtataguyod ng diplomatikong ugnayan sa mga kalakalan, at pagrepresenta sa interes ng sektor ng IT-BPM sa pandaigdigang mga forum.

Ikalawa, ang paglulunsad ng Global Data Privacy Compliance Program. Magkakaroon ng pagsunod ang bansa sa mga pandaigdigang pamantayan sa data privacy gaya ng General Data Protection Regulation (GDPR) at APEC Cross-Border Privacy Rules (CBPR) upang mapabuti ang kakayahang makipagkumpitensya at masagot ang mga alalahanin ng mga kliyente ukol sa seguridad ng datos.

Ikatlo, ang pagpapalakas ng mga insentibo para sa dayuhang pamumuhunan sa Global Capability Centers o GCCs. Inirerekomenda ang pagtaas ng mga fiscal at non-fiscal incentives upang hikayatin ang mga multinasyunal na kumpanya na magtayo o palawakin ang kanilang mga operasyon sa Pilipinas, na kasalukuyang nagbibigay ng 250,000 trabaho.

Ikaapat, ang pagbuo ng Digital Public Works Program. Layunin ng programang ito na lumikha ng mga trabaho para sa mga manggagawa ng IT-BPM na naapektuhan ng automation o reshoring, at suportahan ang mga lokal na digital transformation projects tulad ng pagpapahusay sa mga sistema ng ospital at pamamahagi ng ayuda.

Ayon sa resolusyon, layunin ng mga hakbang na ito na mabawasan ang kahinaan ng industriya sa mga pagbabago sa polisiya ng ibang bansa at mapanatili ang posisyon ng Pilipinas sa pandaigdigang merkado ng digital services.