Camp Capt. Julian Olivas, Lungsod ng San Fernando, Pampanga — Muling nagkamit ng malaking tagumpay ang Police Regional Office 3 (PRO3) sa pinaigting nitong kampanya kontra ilegal na droga matapos maaresto ang isang high-value individual (HVI) at dalawa pang suspek sa isang pinagsanib na buy-bust operation sa Talavera, Nueva Ecija nitong Martes ng gabi.

Isinagawa ang operasyon sa Barangay Calipahan, Talavera, ng mga operatiba ng Talavera Police Station Drug Enforcement Team, sa koordinasyon ng Nueva Ecija Police Provincial Office.

Nasamsam ng mga awtoridad ang ilang sachet ng shabu na may kabuuang halagang P2,040,000.

Ayon kay PRO3 director Brig. Gen. Ponce Rogelio I. Peñones Jr., pinatutunayan ng matagumpay na operasyon ang tuluy-tuloy at intelligence-driven na kampanya ng rehiyon laban sa ilegal na droga.

“Pinagtitibay ng mga resultang ito ang aming pangako na protektahan ang ating mga komunidad at walang humpay na tugisin ang mga sangkot sa ilegal na droga sa pamamagitan ng mga legal at magkakaugnay na operasyon,” pahayag ni Peñones.

Sinusuportahan din ng operasyon ang PNP Focused Agenda ng acting Chief PNP Lt. Gen. Jose Melencio C. Nartatez Jr. at pinatitibay ang 3Ps ng PRO3 — Protect the People, Pursue Peace and Order, at Promote Professionalism — habang patuloy na pinaiigting ang kampanya laban sa ilegal na droga.