INIIMBITAHAN ni Pangulong Ferdinand R. Marcos Jr. si Pangulong Donald Trump ng Estados Unidos na bumisita sa Pilipinas sa 2026 upang dumalo sa mga pulong kaugnay ng ika-44 na Association of Southeast Asian Nations (ASEAN) Summit na pamumunuan ng Maynila.

Binanggit ni Pangulong Marcos na ang pagho-host ng Pilipinas ng ASEAN Summit ay kasabay rin ng paggunita sa ika-80 taon ng diplomatikong ugnayan ng Maynila at Washington, at ika-75 taon ng Mutual Defense Treaty (MDT).

“Inaasahan kong maho-host natin si Pangulong Trump sa susunod na taon para dumalo sa mga pulong ng ASEAN sa ilalim ng pamumuno ng Pilipinas, na kasabay rin ng paggunita sa ika-80 taon ng ating diplomatikong ugnayan at ika-75 taon ng Mutual Defense Treaty,” ani Pangulong Marcos sa kanyang arrival statement matapos ang tatlong araw na opisyal na pagbisita sa Estados Unidos.

Binigyang-diin ni Pangulong Marcos ang kahalagahan ng alyansa ng Pilipinas at Estados Unidos, at ang kabuluhan ng kanyang pakikipagpulong sa bagong Pangulo ng Amerika.

“Ang Estados Unidos ang ating pinakamatagal at tanging kaalyadong may kasunduan, at mahalaga ang aking pagbisita upang itaguyod ang ating makasaysayan at masiglang kooperasyon, pagkakapantay-pantay, at magkasanib na estratehikong interes,” ani Pangulong Marcos.

Itinampok din ng Pangulo ang katatagan ng alyansa ng Pilipinas at Estados Unidos sa pagpapanatili ng katatagan sa rehiyon.

Ayon pa kay Pangulong Marcos, muling pinagtibay ng kanyang pagbisita ang “matibay na paninindigan” ng dalawang bansa sa ilalim ng 1951 Mutual Defense Treaty, na kanyang inilarawan bilang haligi ng patakarang pangseguridad ng Pilipinas.