MARIING pinabulaanan ni Senate President Pro Tempore Panfilo “Ping” M. Lacson nitong Linggo ang diumano’y “Breaking News” post na nagsasabing may panibagong pagbabago sa pamunuan ng Senado at tinawag itong “Faky Breaky News.”

“Peke. Intended to deceive and confuse. Underestimating the intelligence of the new Senate majority bloc, nagba-baka sakaling may tumalon at magpirma,” ani Lacson. Dagdag pa niya, “Malevolent, underhanded, foul and desperate. Kung may song na ‘Achy Breaky Hearts,’ eto naman — ‘Faky Breaky News.’”

Ang post ay lumabas 9:12 p.m. nitong Sabado at may caption na “BREAKING: Another Regodon (sic) in the Senate?” Ipinaskil ito ng “OneTV Philippines” at nagsabing, umano—batay sa “reliable source”—na “Senate Minority Leader Allan (sic) Peter Cayetano secures numbers for Senate presidency.”

Batay sa Facebook page ng “OneTV Philippines,” inilalarawan nito ang sarili bilang “a Digital News Network Globally-Based in Davao City and Pagadian City,” at nakabase sa Pagadian City. Sa pagsuri sa YouTube channel nito noong Linggo ng umaga, natuklasan na wala pa itong 2,000 subscribers at huling na-update noong Hulyo 2024.

Binigyang-diin ni Lacson na may tamang paraan at propesyonal na proseso sa pagpapalit ng liderato sa Senado: “The proper and professional way is to call or approach the Senate president, inform and show him the resolution signed by at least 13 senators, then the sitting Senate President resigns at the opening of the session, not through a media outlet, whether nationally recognized or obscure.”

Tinukoy din niya ang kanyang post sa X, dating Twitter, na mababasa sa link na ito: https://x.com/iampinglacson/status/1967012669480989056.

Matatandaang nagkaroon ng pagbabago sa pamunuan ng Senado noong Setyembre 8, nang mahalal na Senate President si dating minority leader Vicente “Tito” Sotto III. Kasabay nito, nahirang si Lacson bilang Senate President Pro Tempore at chairman ng Senate Blue Ribbon Committee.