KINUWESTYON ni Senador Panfilo “Ping” Lacson kung paano raw masasabing hindi nangumusta ang minority bloc sa kanilang mga kasamahan matapos ang insidente ng putukan sa Senado noong Mayo 13, kung may ilang senador naman umanong nakitang kumakain, nagkakape at naka-Facebook Live habang may mga ibinabatong paratang laban sa minorya.

“Paano mo ba naman kukumustahin ang mga masasayang nagkakainan, nagkakape, at naka-FB live pa para pagbintangan ang minority bloc na may alam daw sa putukan ng baril sa Senado?,” ani Lacson sa isang post sa X.

Inilabas ni Lacson ang pahayag matapos maging emosyonal si Senadora Pia Cayetano sa plenaryo noong Miyerkoles habang inaalala ang takot na naramdaman ng mga senador na nasa loob ng gusali ng Senado nang mangyari ang insidente.

Ayon kay Cayetano, nasaktan siya dahil wala raw mula sa minority bloc ang nangumusta sa kanila matapos ang pangyayari.

“Wala man lang nangumusta sa amin,” ani Cayetano sa kanyang talumpati, habang naging emosyonal sa pagtalakay sa epekto ng insidente sa mga senador at kawani ng Senado.

Ang mga pahayag ay may kaugnayan sa insidente noong Mayo 13, nang may naiulat na putukan sa loob ng Senate complex sa gitna ng tensyon sa kapulungan.

Nagresulta rin ang isyu sa magkakaibang pahayag mula sa mga senador kung inatake nga ba ang Senado, kung nasunod ang tamang proseso, at kung paano dapat magpatuloy ang opisyal na imbestigasyon.

Nangyari ang insidente sa gitna ng tensyon sa Senado kasunod ng pagbabago sa liderato at habang may mga ulat kaugnay ng posibleng law enforcement action laban kay Senador Ronald “Bato” dela Rosa.

Patuloy ding inaayos ng Senado ang mga komite nito at naghahanda sa impeachment proceedings laban kay Vice President Sara Duterte.

Dagdag ang pahayag ni Lacson sa nagpapatuloy na palitan ng mga senador hinggil sa insidente, sa naging aksyon ng Senate security, at sa pakikitungo ng mga kasamahan matapos maiulat ang putukan.