TUTOL nitong Huwebes si House Committee on Justice Chair at lead prosecutor Gerville “Jinky Bitrics” Luistro ng Batangas sa mga panukalang papayagan ang mga senator-judges na lumahok o bumoto nang malayuan sa impeachment trial ni Vice President Sara Z. Duterte, dahil aniya ang bigat ng proseso ay nangangailangan ng kanilang personal na presensya sa buong paglilitis.

“Ang mapagpakumbaba kong pananaw sa isyung ito ay dapat personal na nasasaksihan ng senator-judge ang trial at dapat personal din siyang bumoboto dahil napakahalaga ng prosesong ito,” sinabi ni Luistro, na isa ring abogado, sa programang Kongreso Ngayon @ Your Service na pinangungunahan nina Manila Rep. Bienvenido Abante at beteranong broadcaster na si Ed Sarto sa dzME.

Inilabas ni Luistro ang pahayag matapos ihain ni Sen. Rodante Marcoleta ang posibilidad na payagang makalahok at makaboto si Sen. Ronald “Bato” dela Rosa sa pamamagitan ng Zoom habang isinasagawa ang impeachment proceedings.

Si dela Rosa, kilalang kaalyado ng Bise Presidente, ay pansamantalang nagtungo sa Senado noong nakaraang linggo matapos maglabas ng arrest warrant ang International Criminal Court laban sa kanya kaugnay ng madugong kampanya kontra droga ng administrasyong Duterte. Kalaunan ay umalis din siya matapos lumahok sa botohan na nagbunsod ng pagbabago sa liderato ng Senado.

“Sa lahat ng paggalang kay Sen. Rodante Marcoleta, nirerespeto namin siya at dati ko siyang kasamahan sa House of Representatives. Gayunpaman, kailangan nating isaalang-alang ang kahalagahan, bigat, at pagiging napakahalaga ng impeachment process na ito,” ani Luistro.

Binigyang-diin ng lider ng Kamara mula Batangas na kinakailangang personal na masaksihan ng mga senator-judges ang mga testigo, dokumento, at video evidence na ihaharap sa impeachment court.

“Napakahalaga po na personal na nakikita ng senator-judge ang bawat testigo,” aniya.

“Napakahalaga rin po na personal na nakikita ng bawat senator-judge ang bawat dokumento at video na inilalatag bilang suporta sa Articles of Impeachment.”

Ayon kay Luistro, mahalagang personal na naoobserbahan ang kilos at asal ng testigo upang matukoy ang kredibilidad at katotohanan ng kanilang testimonya.

“Ang demeanor o asal ng testigo ay nagsasabi kung siya ba ay nagsasabi ng totoo o hindi,” aniya.

Nagbabala rin siya laban sa posibilidad na ang mga desisyon sa impeachment ay ibatay lamang sa remote participation.

“Mahirap ipaubaya na dedesisyunan ito batay lamang sa online voting o online participation sa sesyon,” sabi ni Luistro.