CABANATUAN CITY–Aabot sa halos P10 milyon ang halaga ng ari-arian ang naabo sa sunog na lumamon sa 10 establisyemento sa loob ng lumang capitol compound sa Brgy. Quezon District sa siyudad na ito noong hatinggabi ng Huwebes.

Ayon sa Bureau of Fire Protection (BFP), naiulat ang insidente dakong alas-11:41 ng gabi.

Kabilang sa mga naabo ang opisina ng Boy Scouts of the Philippines-Nueva Ecija Chapter, Language Skills Institute, Civilian Security Unit at pitong karinderya.

Hinihinala ng mga otoridad na nagsimula ang sunog sa isang karinderya na kasama sa natupok ng apoy.

Idineklarang under control ang sunog bandang alas-12:31 ng madaling araw at naapula ala-1:13 ng madaling araw.