DALAWA ang maghahati sa P73.77 milyong jackpot prize ng SuperLotto 6/49 sa bola noong Huwebes ng gabi, Hunyo 23.

Ayon sa Philippine Charity Sweepstakes Office (PCSO) ang mga nakakuha ng winning number combination na 36-07-14-21-20-42 ay tumaya sa Tarlac City at Iloilo City.

Nanalo naman ng tig-P50,000 ang 34 mananaya na nakakuha ng lima sa anim na numerong lumabas. Tig-P1,200 naman ang 1,776 mananaya na nakaapat na numero at tig-P50 ang 26,888 mananaya na nakatatlong numero.

Ang premyo na mahigit P10,000 ay papatawan ng 20 porsyentong buwis.

Mayroong isang taon ang mga nanalo para kunin ang kanilang premyo.