MACABEBE, Pampanga ― Isang 52-anyos na mangingisda ang nasawi noong Huwebes matapos tamaan ng kidlat habang nag-aalaga ng kanyang palaisdaan sa Barangay Consuelo, Macabebe.

Sa ulat kay Police Regional Office 3 Director Brig. Gen. Ponce Rogelio Penones Jr., kinilala ng pulisya ng Pampanga ang biktima na si Alexander Salonga, residente ng Dalusong, Barangay Consuelo.

Batay sa pahayag ng isang saksi, abala si Salonga sa pagpapakain ng bangus nang biglang tumama ang malakas na kidlat sa lugar.

Ayon kay Arlyn dela Cruz, isang tagapangalaga ng palaisdaan mula Hagonoy, Bulacan, natagpuan nila ang biktima na nakalubog sa tubig kung saan ito nagtatrabaho.

Isinugod si Salonga sa Macabebe District Hospital sa Bgy. Batasan ngunit idineklara siyang dead on arrival.

Iniulat ng mga awtoridad na nagtamo ng matinding paso sa katawan ang biktima, na pinaniniwalaang lumala dahil siya ay nasa tubig nang tamaan ng kidlat.