ALINSUNOD sa direktiba ni Pangulong Ferdinand “Bongbong” R. Marcos, Jr. na tiyakin ang kaligtasan sa mga lansangan, personal na nagsagawa ng biglaang inspeksyon si Land Transportation Franchising and Regulatory Board (LTFRB) Chairman Atty. Vigor D. Mendoza II sa ilang bus terminal sa Bacolod City noong Sabado, Oktubre 18. Ito ang hudyat ng pagsisimula ng serye ng biglaan at random na inspeksyon sa mga transport terminal at pampublikong sasakyan sa buong rehiyon bilang bahagi ng mga hakbang para sa kaligtasan ngayong nalalapit na paggunita ng Undas sa Nobyembre 1 at 2.

Kabilang sa mga terminal na ininspeksyon ay ang Ceres North Bus Terminal at Bacolod North Bound Terminal.

“Nais nating matiyak na ang mga kumpanya ng transportasyon ay tunay na sumusunod sa mga alituntunin ng LTFRB para sa kaginhawahan ng mga pasahero,” pahayag ni Chairman Mendoza.

“Palapit na nang palapit ang Undas at napakarami sa ating mga kababayan ang maglalakbay. Kaya’t maaga pa lang, tinutugunan na natin ang mga karaniwang reklamo sa mga bus terminal,” dagdag pa niya.

Sinuri ni Chairman Mendoza ang mga pasilidad mula sa mga waiting area hanggang sa mga palikuran sa dalawang pangunahing terminal, at binigyang-diin na ang ganitong mga inspeksyon ay isasagawa nang regular.

Mula nang maupo sa posisyon, agad na inatasan ni Chairman Mendoza ang lahat ng Regional Director ng ahensya na magsagawa ng inspeksyon sa mga bus at transport terminal bilang paghahanda sa inaasahang dagsa ng pasahero ngayong Undas.

Inatasan din ang lahat ng kumpanya ng bus at operator ng pampublikong transportasyon na tiyaking ligtas at kumportable ang kanilang mga terminal at istasyon para sa mga pasahero.

Bukod sa mga pasilidad, tiniyak ni Chairman Mendoza na ligtas ang mga pampublikong sasakyan—mula sa mismong mga bus hanggang sa mga drayber at konduktor—upang masiguro ang maayos at ligtas na biyahe ng mga pasahero.

Sa parehong pagbisita, sumakay si Chairman Mendoza sa isang pampasaherong jeep bilang pagtugon sa direktiba ni DOTr Secretary Giovanni Z. Lopez sa lahat ng opisyal ng kagawaran na gumamit ng pampublikong transportasyon upang personal na maranasan ang sistema at makapagbigay ng rekomendasyon sa mga suliranin sa transportasyon.

Inaasahan ni Chairman Mendoza na gagawin din ito ng lahat ng Regional Director ng LTFRB, at sa ngayon ay nakatuon ang ahensya sa mga paghahanda para sa Undas sa pamamagitan ng personal na inspeksyon ng mga RD na isasagawa nang regular.

“Hindi lang tuwing Undas, Mahal na Araw, o Pasko. Dapat regular ang inspeksyon para sa kapakanan ng ating mga pasahero,” ani Chairman Mendoza.

Upang matiyak ang pagsunod, magpapadala ang LTFRB ng mga ‘mystery passenger’ sa buong bansa upang suriin ang kalagayan ng mga bus station at transport terminal simula Oktubre 24.

Nagbabala rin si Chairman Mendoza sa mga kumpanya ng transportasyon na maaaring humarap sa kaukulang parusa kung mabibigong tugunan ang mga pangunahing pangangailangan ng kanilang mga pasahero.