Calendar
Mga bangko inutusang magsumite ng records nina Duterte, Carpio by Sept. 2
INATASAN ng Senate impeachment court ang ilang bangko at financial institutions na isumite pagsapit ng Setyembre 2 ang mga peso financial records ni Vice President Sara Duterte, asawang si Atty. Manases Carpio at 20 entities na saklaw ng supplemental subpoena request ng prosecution.
Ipinagkaloob ni impeachment court Presiding Officer Francis “Chiz” Escudero noong Miyerkules ang kahilingan at sinabing ipatutupad ang mga limitasyong itinakda ng korte sa ruling nito noong Hulyo 20.
Hindi pinangalanan sa open court ang mga dagdag na bangko at financial institutions at sinabi ni Escudero na may mga kopya ng kahilingan ang prosecution at defense.
Nilinaw ni Escudero na peso-denominated accounts lamang ang saklaw ng mga bagong subpoena.
Inatasan niya ang Clerk of Court na ilabas at ihain ang mga subpoena at binigyan ang mga saklaw na institusyon ng pitong araw upang isumite ang mga dokumento.
“The clerk of court is directed to cause the issuance and service of the subpoenas to the entities requested to so submit, who shall produce the required documents before the clerk of court in seven calendar days from today, or on September 2, Wednesday, next week, 2026,” sabi ni Escudero.
Ang kautusan ay karagdagan sa Hulyo 20 ruling ng impeachment court sa mga kahilingan ng prosecution para sa financial records kaugnay ng Article II ng impeachment complaint laban kay Duterte.
Sa naunang ruling, pinahintulutan ng korte ang pagkuha sa pamamagitan ng subpoena ng ilang peso-denominated financial records ngunit hindi isinama ang foreign-currency deposits kung walang written consent ng depositor.
Hiniling ng prosecution ang mga financial records kaugnay ng mga alegasyon nito sa Article II. Ang pag-isyu ng subpoena ay nag-uutos lamang sa mga saklaw na institusyon na magsumite ng tinukoy na records at hindi nangangahulugang napatunayan na ang mga alegasyon laban kay Duterte.
Inilagay sa record ng defense lead counsel na si Sheila Sison na inilalaan ng kampo ni Duterte ang karapatang tumutol at gumamit ng mga available na remedyo kaugnay ng subpoenaed records.
