NANAWAGAN si Philippine National Police (PNP) Acting Chief, Lieutenant General Jose Melencio C. Nartatez Jr. nitong Miyerkules sa lahat ng residente ng lalawigan ng Basilan na umiwas sa karahasan at sa halip ay suportahan ang mga pagsisikap ng pambansang pamahalaan para sa kapayapaan at kaayusan.

Ayon kay Nartatez, bilang pagsunod sa direktiba ni Pangulong Ferdinand R. Marcos Jr., inatasan din sila ni Department of the Interior and Local Government (DILG) Secretary Juanito Victor C. Remulla na panatilihin ang kapayapaan, kaayusan, at kabanalan ng buhay ng tao sa naturang lalawigan.

Pinangunahan din ng pansamantalang hepe ng PNP ang kanyang mga tauhan sa pagkondena sa marahas na pagpatay kay Ustadz Nadzmi “Bahang” Tarahin noong Oktubre 21.

Ang pagkamatay ni Bahang, na sinasabing miyembro ng Moro Islamic Liberation Front (MILF), ay nagdulot ng galit sa kanyang mga kaanak at kasamahan, dahilan upang magkaroon ng pansamantalang sagupaan sa bayan ng Tipo-Tipo na kinasangkutan ng humigit-kumulang 100 armadong kasapi ng MILF at iba pang lawless elements.

“Ipinapaabot ng PNP ang taos-pusong pakikiramay sa naulilang pamilya, sa pamayanang Muslim, at sa mamamayan ng Basilan. Nauunawaan namin ang sakit at dalamhati dulot ng trahedyang ito, at kami ay nananawagan ng kalma, pagpipigil, at kooperasyon upang maiwasan ang lalo pang paglala ng tensyon sa Tipo-Tipo,”
ayon kay Lt. Gen. Nartatez.

Dagdag pa niya, sa mahigpit na koordinasyon sa Armed Forces of the Philippines (AFP), pamahalaang panlalawigan ng Basilan, at mga lokal na katuwang, pinaigting ng PNP ang seguridad at imbestigasyon upang matiyak na makakamit ang hustisya habang pinapanatili ang kapayapaan at kaayusan sa lugar.

“Nanawagan kami sa lahat na iwasan ang karahasan at paghihiganti, at sa halip ay suportahan ang pinagsamang peace at law enforcement initiatives ng AFP, PNP, mga lokal na lider, at ng Moro Islamic Liberation Front,” dagdag ni Nartatez.

Muling tiniyak ng opisyal ang pangako ng PNP na ipatupad ang batas at protektahan ang kaligtasan at kapakanan ng bawat Pilipino.

“Sa pamamagitan ng pagkakaisa, pagtutulungan, at pagsunod sa batas, magwawagi ang kapayapaan at katarungan sa Basilan,” ani Nartatez.

Sitwasyon sa Tipo-Tipo

Noong Linggo at Lunes, nagkaroon ng bakbakan sa pagitan ng mga puwersa ng gobyerno at mga armadong miyembro ng MILF at iba pang lawless elements na umatake sa ilang target sa Tipo-Tipo, Basilan.

Ayon sa mga opisyal, nagsimula ang kaguluhan bilang ganti umano ng pamilya ng nasawing kasapi ng MILF laban sa ilang barangay security forces, ngunit tiniyak nilang kontrolado pa rin ng mga puwersa ng gobyerno ang mga kritikal na lugar sa lalawigan.

Naganap ang sagupaan nang ipinagtanggol ng militar at pulisya ang Tipo-Tipo National High School at municipal hall mula sa humigit-kumulang 100 armadong kalalakihan mula sa Barangay Baguindan patungong poblasyon ng Tipo-Tipo noong Linggo.

Tuluyang sumiklab ang labanan noong Linggo at Lunes habang nananatili sa kanilang posisyon ang mga tropa ng Joint Task Group Basilan at Army’s 101st Brigade, habang isinasagawa ng mga lokal na opisyal ang negosasyon upang maibsan ang tensyon.

Bago ito, iniulat ng Police Regional Office – Bangsamoro Autonomous Region in Muslim Mindanao (PRO-BARMM) na noong Oktubre 21, binaril hanggang mamatay ng mga hindi pa nakikilalang suspek ang matandang si Bahang sa Lamitan City.

Makaraan ang limang araw, o noong Linggo, nagpalitan ng putok ang anak at pamangkin ng napatay na MILF member at isang kasapi ng Barangay Peacekeeping Action Team sa Tipo-Tipo, na nagresulta sa pagkakasugat ng anak ng nasawing MILF member.

Noong Lunes, namataan ng mga intelligence agent ang humigit-kumulang 100 armadong lalaki na naglalakad mula Barangay Baguindan patungong Tipo-Tipo proper, dahilan upang ilagay sa full alert status ang lahat ng puwersa ng gobyerno sa lugar.

Bandang 6:38 n.u. ng Martes, ginamit ng mga armadong lalaki ang M203 grenade launchers sa pangha-harass sa Tipo-Tipo Municipal Hall at sa mga pwersang nagbabantay sa Tipo-Tipo National High School.

Napilitang gumanti ng putok ang mga tropa ng gobyerno upang mapigilan ang mga lawless elements na sakupin ang kanilang mga posisyon.

Walang naiulat na nasawi mula sa panig ng pamahalaan, at patuloy pa ring tinutukoy ng pulisya kung ilan ang nasugatan sa panig ng mga kalaban.

Sa kasalukuyan, nagsasagawa na ng negosasyon ang Provincial Peace and Order Council kasama ang mga kinatawan ng mga umatake at ng pamunuan ng MILF.

Nakaantabay din ang mga attack helicopters ng Air Force at gunboats ng Navy para sa posibleng pagresponde, habang nagpupulong ang mga opisyal ng lokal na pamahalaan, AFP, at PNP upang pababain ang tensyon.

Samantala, itinaas sa full alert ng Police Regional Office 9 (PRO9) sa Zamboanga Peninsula ang kanilang mga yunit matapos ang insidente.

“Sakop ito ng BARMM pero dahil malapit sa Zamboanga, nakataas kami sa full alert upang maiwasan ang pagkalat ng karahasan,” pahayag ni PRO9 Director Brigadier General Eleazar P. Matta.

Sa isang Facebook post, inanunsyo ng Lokal na Pamahalaan ng Tipo-Tipo na suspendido muna ang klase, trabaho sa pamahalaan, at mga gawaing pangkabuhayan sa lugar hanggang sa karagdagang abiso dahil sa insidente.