MULING pinagtibay ni 1Tahanan Party-list Representative Nathaniel “Atty. Nat” Oducado ang kanyang paninindigan na isulong ang mga batas na magpapalakas sa paglago at kompetisyon ng industriyang maritima ng Pilipinas, matapos ang mahalagang pulong sa mga opisyal ng Maritime Industry Authority (MARINA).

Nakipagpulong si Oducado sa mga opisyal ng MARINA upang talakayin ang mga panukalang batas sa ika-20 Kongreso na layuning iangat ang kalagayan ng industriya ng maritima sa bansa.

Isa sa mga pangunahing mungkahi ng MARINA ay ang pagpapalakas ng Philippine Ship Registry, upang mas maraming barkong pag-aari ng mga Pilipino ang makapaglayag sa ilalim ng ating watawat, habang sumusunod sa mga pandaigdigang pamantayan.

“Isa ito sa mga pangunahing adbokasiyang nais kong itulak sa Kongreso,” pahayag ni Oducado. “Naniniwala akong napakahalaga ng isang malakas na industriya ng maritima hindi lamang sa pagpapalago ng ekonomiya sa pamamagitan ng kalakalan at transportasyon, kundi pati na rin sa paglikha ng trabaho, pagpapaunlad ng mga rehiyon, at pagpapalakas ng pambansang seguridad.”

Isa pang mahalagang punto sa pulong ay ang pagpapaunlad ng shipbuilding at ship repair (SBSR) industry, na may malaking potensyal upang gawing sentro ng inobasyong maritima at bihasang manggagawa ang Pilipinas sa rehiyon ng Asya.

“Kabilang tayo sa mga pangunahing bansa sa buong mundo sa paggawa ng barko, na nakapagtala ng 805,938 gross tonnage (GT),” dagdag ni Oducado. “Sagana tayo sa malalalim na katubigan para sa pagpapaunlad ng mga daungan at shipyard, at may mahabang kasaysayan tayo sa larangan ng maritima at paggawa ng barko.”

Ipinaliwanag ni Oducado na ang Pilipinas ay isang pangunahing pinagkukunan ng manggagawang marino, na umabot sa 578,672 seafarers, batay sa 2023 datos ng MARINA.

Binigyang-diin din ng mambabatas na may mga shipyard sa iba’t ibang daungan sa bansa na tumutugon sa mga pangangailangan ng afloat ship repairers, boatbuilders, at shipbreakers.

“60% ng mga shipyard ay may sariling shipways o ginagamit ito, at 66% ng 186 shipyards sa bansa ang nangangailangan ng rehabilitasyon,” aniya.

Dagdag pa ni Oducado, ang Pilipinas ay likas na bansang maritima, dahil isa itong kapuluan na binubuo ng mahigit 7,000 isla. Ang mga karagatan ay hindi lamang natural na hangganan, kundi pampinansyal na ugat, estratehikong yaman, at bahagi ng ating kultura at pagkakakilanlan.

Naniniwala siyang milyon-milyong Pilipino ang umaasa sa karagatan para sa kanilang kabuhayan at transportasyon—mula sa pangingisda, pagpapadala ng kalakal, hanggang sa maritime labor.

“Ang pagpapatatag ng sektor na ito ay hindi lamang kapaki-pakinabang, kundi esensyal sa pambansang kaunlaran ng ating bansa,” pagtatapos ni Oducado.