INAMIN ni Office of the Vice President Assistant Secretary Lemuel Ortonio nitong Martes na hindi niya personal na nakita ang mga acknowledgement receipt para sa mga gamot, pagkain at iba pang items na binili ng mga agents, habang tinatalakay ng prosekusyon ang hiling ng OVP noong 2022 para sa humigit-kumulang P144 milyon na karagdagang pondo para sa medical assistance.

Sa direktang pagtatanong sa impeachment trial ni Vice President Sara Duterte, kinumpirma ni Ortonio ang mga dokumentong may kaugnayan sa August 2022 request ng OVP para sa karagdagang pondo, kabilang ang medical assistance.

Isang sumunod na OVP submission na may petsang September 19, 2022 ang naglakip ng computation o pagtataya sa kinakailangang pondo para sa medical assistance.

Nang tanungin tungkol sa mga dokumentong sumusuporta sa pagbili ng mga gamot at pagkain, sinabi ni Ortonio na hindi niya nakita ang mga acknowledgement receipt.

“I was not able to see any of the acknowledgment receipts,” ani Ortonio.

Sinabi rin niya na ang mga agents na sangkot sa mga aktibidad ang bumibili ng mga gamot, pagkain at iba pang kailangan.

Hindi sinabi ni Ortonio na personal niyang nasaksihan ang mga pagbili o nasuri ang mga acknowledgement receipt na sumusuporta sa mga ito.

Wala ring official receipts na ipinakita para sa mga naturang pagbili sa bahaging iyon ng kanyang direct examination. Ang mga dokumentong tinukoy sa pagdinig ay acknowledgement receipts.

Sa hiwalay na OVP response na ipinakita sa impeachment court, nakasaad na P24.93 milyon ang ibinigay bilang cash payments sa mga indibidwal para sa pagbili ng gamot at pagkain.

Ayon sa nakasulat na paliwanag ng OVP, ang medical at food aid ay para sa mga indibidwal na inatasang magsagawa ng surveillance at information-gathering activities at maaaring ituring na gastusin kaugnay ng confidential operations.

Ang paliwanag na iyon ay posisyon ng OVP sa nakasulat nitong tugon at hindi personal na pagpapatunay ni Ortonio sa bawat pagbili.

Ginamit ng prosekusyon ang testimonya ni Ortonio upang matukoy kung sino ang naghanda at nagsumite ng mga dokumento at kung sino ang may personal na kaalaman sa mga transaksiyong ginamit bilang batayan sa paggastos.

Labinlimang senator-judges lamang ang dumalo sa pagdinig nitong Martes.