PINAYAGAN ni Presiding Officer Sen. Francis “Chiz” Escudero nitong Martes ang hiling ng House prosecution panel na bawiin ang tatlo sa apat na articles of impeachment laban kay Vice President Sara Duterte. Tanging ang Article II sa umano’y unexplained wealth ang natira.

“Articles I, III and IV from this point forward are hereby withdrawn,” ani Escudero matapos ang informal caucus ng mga senator-judge.

Saklaw ng mga binawing artikulo ang umano’y maling paggamit ng confidential funds, bribery at pagbabanta.

Bago ang pasya, nilinaw ni Escudero na korte, at hindi ang prosekusyon, ang magpapasya sa pagbawi. Aniya, kahit walang pormal na pagtutol ang depensa, nasa diskresyon pa rin ng korte ang withdrawal.

“Once articles of impeachment are filed before the court or any complaint filed before any court for that matter, it is already subject to and under the jurisdiction and disposition of the court, not by the party,” ani Escudero.

Ayon kay Senator-judge Alan Peter Cayetano, sang-ayon siya kay Escudero na saklaw ng Corona precedent ang artikulo sa bribery, dahil walang testigo o dokumentong iniharap dito. Iba naman, aniya, ang dalawang artikulong may naiharap nang ebidensiya.

Iginiit ni lead prosecutor at Batangas Rep. Gerville Luistro na hindi na dapat saklawin ng hatol ang mga binawing artikulo.

“We believe, Your Honor, that by the withdrawal of the three articles by the prosecution, it means that this will no longer be part of the impeachment trial,” ani Luistro.

“And therefore, they are no longer proper subject matter of the verdict to be rendered by the Honorable Impeachment Court,” dagdag niya.

Ayon kay Luistro, nabuo ang desisyon “after a careful study of what is best for the impeachment court, for the public, and even for the respondent.” Aniya, nakalahok ang depensa sa mahabang cross-examination at nakapagharap din ito ng sariling dokumento.

“And if the desire of the defense is to be able to share all the pieces of evidence that they have, there are a lot of platforms which they may consider, Your Honor, if the intention only is to share this publicly,” aniya.

Mariing tinutulan ito ni defense lead counsel Atty. Sheila Sison. “It is unbelievable. And to be honest, it is unacceptable,” wika niya.

Tanong ni Sison, gusto ba ng prosekusyon na sa Facebook na lamang sumagot ang Bise Presidente.

“Matapos nilang sirain ang vice-presidente sa harap ng publiko,” aniya.

“The prosecution’s case must stand or fall on its own. That’s their burden. That’s not the defence burden,” dagdag ni Sison.

Iginiit din ni Sison na ang pagbawi ay “one of the reasons why the entire articles of impeachment should be dismissed.”

Nilinaw ni Luistro na ang pahayag niya tungkol sa “platforms” ay “in response to the statement of the defense that the evidence of the prosecution have been seen by the public already.”

Kinuwestiyon naman ni Cayetano ang pagmamadali sa paglilitis. Aniya, walang itinakdang deadline ang Konstitusyon para rito.

“Who is saying that we have to finish this by November?” tanong ni Cayetano. “I’m very uncomfortable with that. I think it will be a disservice to the Filipino people.”

Ipinunto ni Cayetano na ang prosekusyon mismo ang pumiling gumugol ng 38 araw sa paglilitis.

“Kung baga sa suntukan, sinuntok nyo na yung defense, then sasabihin nyo to save time, wag na kayong gumanti,” aniya.

“Pero kung sasabihin hindi lang namin i-pre-present pero malakas ang case namin, pero kayo hindi kayo pwede mag-present ng evidence, hindi po talaga mag-square,” ani Cayetano.

Hindi pa malinaw kung maghaharap pa ang depensa ng sariling ebidensiya para sagutin ang tatlong binawing artikulo, at kung papayagan ito ng korte.