“IPAGPAPAPATULOY ang serbisyo kahit na ano ang nangyari… umaasa ang taumbayan sa pamahalaan na tuloy-tuloy ang trabaho.”

Isang survey ng Social Weather Stations (SWS) para sa ikalawang bahagi ng 2025 ang nagpakita na halos kalahati o 46 porsyento ng mga Pilipino ang nasisiyahan sa performance ni Pangulong Ferdinand R. Marcos Jr., pataas mula sa 38 porsyento noong Abril.

Nagpahayag ng sorpresa si Pangulong Marcos sa kanyang pinabuting satisfaction rating, na patuloy na nakatuon sa pamamahala at paglilingkod sa taumbayan.

Sa isang panayam ng media noong Miyerkules, sa kanyang pagbisita sa Masbate para mamahagi ng tulong sa isa sa mga lugar na pinaka-apektado ng Bagyong Opong, sinabi ni Pangulong Marcos na magpapatuloy ang pampublikong serbisyo sa kabila ng anumang kontrobersiya.

“Sa tingin ko, kailangan lang naming magpatuloy sa trabaho. Kahit ano ang nangyayari, kahit na ano ang nangyari, kahit may bagyo, kahit may iskandalo, kahit may gulo, umaasa ang taumbayan sa pamahalaan na tuloy ang serbisyo, tuloy ang trabaho ng pamahalaan sa bawat antas – sa pambansang antas, sa lokal na antas, na tuloy-tuloy lang,” sabi ng Pangulo sa media na humingi ng kanyang komento sa kanyang pinabuting ratings.

Ang SWS survey, na isinagawa mula Hunyo 25 hanggang 29 at inilabas noong Martes, ay nagpakita ng netong satisfaction rating na +10, na kinompyut mula sa 46 porsyentong nasisiyahan minus ang 36 porsyentong hindi nasisiyahan.

Ang +10 netong satisfaction rating ng Pangulo noong Hunyo ay isang 20-point na pagtaas mula sa -10 rating noong Abril.

Sinabi ni Pangulong Marcos na hindi siya pamilyar sa survey pero pinahahalagahan ang pagkilala ng taumbayan sa mga pagsisikap ng pamahalaan na tugunan ang kanilang pangangailangan.

“Alam mo, wala akong ideya. Hindi ko gaanong pinapansin ang (survey). Siyempre, magandang malaman. Hindi ko alam iyon. Pero ngayong sinabi mo, siyempre natutuwa ako na ganun. Sa tingin ko, kailangan lang namin patuloy na magtrabaho,” sabi ng Pangulo.

Binigyang-diin ni Pangulong Marcos na ang buong pamahalaan ay nagsusumikap upang tiyakin na ang mga pampublikong lingkod, na ihinalal ng taumbayan, ay nakatuon sa pagpapagaan ng pang-araw-araw na pasanin ng mga Pilipino.

“Kaming mga pampublikong lingkod, kaming mga hinalal ng taumbayan ay dapat nakikita na hindi naglalaro, na kung ano-anong ginagawa, namumulitika, basta’t nagtatrabaho lang para makapagserbisyo sa tao,” sabi ng Pangulo. PCO