NAGBABALA nitong Sabado ang Philippine Drug Enforcement Agency (PDEA) at ang Dangerous Drugs Board (DDB) sa publiko ukol sa paglaganap ng mapanganib na sigarilyong tinatawag na “Thuoc Lao,” na mas kilala sa lokal na tawag na “Tuklaw.”

Ayon kay PDEA Director General Undersecretary Isagani R. Nerez, lumabas sa isinagawang laboratory examination sa mga nakumpiskang “Tuklaw” na sigarilyo na ito ay may taglay na nicotine at synthetic cannabinoid—isang kemikal na ginaya ang epekto ng marijuana ngunit mas malakas at mas delikado.

Paliwanag ni Nerez, maaaring makaranas ng psychotic episodes at hallucinations ang mga taong gumagamit ng “Tuklaw.”

Binanggit rin niya ang ilang ulat tungkol sa mga kabataang nakaranas ng sintomas tulad ng panandaliang pagkisay at pag-igtad ng katawan matapos gumamit ng “Tuklaw.”

Inilarawan din niya ang “Thuoc Lao” bilang halamang tabako na tumutubo sa kabundukan ng Hilagang Vietnam. Karaniwang niluluto ito sa pamamagitan ng pagnguya o pagsisigarilyo gamit ang bamboo bong bilang bahagi ng kanilang mga ritwal.

Ang nicotine content ng “Thuoc Lao” ay maaaring umabot hanggang 9 porsiyento, mas mataas kumpara sa karaniwang sigarilyo na may 1–3 porsiyento lamang.

“Ang mga nakamamatay na sigarilyong ito na may halong synthetic cannabinoid ay ipinupuslit sa bansa at diumano’y ibinebenta online. Hinihikayat ng PDEA ang publiko na huwag tangkilikin ang ‘Tuklaw’ dahil sa matinding panganib nito sa kalusugan. Sa mga magulang, pakiusap, sabihan ang inyong mga anak na huwag subukan ito,” pahayag ng PDEA chief.

Dagdag pa niya, mag-ingat sa mga gumagawa ng “shotgun smoking”—ang pamimilit na hipan ang usok ng “Tuklaw” sa bibig ng ibang tao upang ito’y malanghap.

Matapos magsagawa ng gas chromatograph–mass spectrometry (GC-MS) tests na nakumpirmang may synthetic cannabinoid sa mga sigarilyo, humingi rin ng tulong ang PDEA Laboratory Service sa mga lokal at internasyonal na forensic laboratories upang makakuha ng tiyak na resulta.

Mula sa aspeto ng regulasyon, plano ng PDEA at DDB na simulan ang pormal na proseso ng paglalagay ng synthetic cannabinoid sa listahan ng mga mapanganib na droga, batay sa Republic Act No. 9165, o Comprehensive Dangerous Drugs Act of 2002, at DDB Regulation No. 1, Series of 2014 hinggil sa klasipikasyon at muling klasipikasyon ng mga delikadong droga, precursor chemicals at iba pa.

Binibigyang-diin ng DDB at PDEA na ang proseso ng pagklasipika ay nakabatay sa ebidensya at iba’t ibang pamantayan, kabilang na ang dokumentadong datos ng pagkakakumpiska; mga ulat ng pang-aabuso at pagkalat; kalagayan nito sa pandaigdigang regulasyon; at lehitimong gamit sa industriya, kultura o medisina.

Layon nitong tiyakin na may tamang safety nets at regulasyon upang maprotektahan ang publiko sa pinsalang dulot ng mga bagong droga tulad ng synthetic cannabinoids.

“Makikipag-ugnayan din ang parehong ahensya sa iba’t ibang sektor, mga eksperto sa kalusugan, at mga sangay ng pamahalaan tulad ng Department of Health, NBI at FDA upang maging komprehensibo, balanse, at maisasakatuparan ang anumang panukalang polisiya,” pahayag ni DDB Chairman Oscar F. Valenzuela.

“Ang pangunahing layunin ay protektahan ang kapakanan ng publiko laban sa banta ng mga nakaka-adik at mapaminsalang substansiya gaya ng synthetic cannabinoids,” dagdag pa niya.