NAGHAIN si Senador Panfilo “Ping” Lacson ng panukalang batas na layuning palawakin ang Pantawid Pamilyang Pilipino Program (4Ps) sa pamamagitan ng pagsasama-sama ng iba’t ibang programang panlipunan ng gobyerno at pagtutok sa pagsugpo ng pamumulitika sa distribusyon ng ayuda.

Sa ilalim ng panukalang “Expanded Pantawid Pamilyang Pilipino Program (4Ps) Act of 2025,” iminumungkahi ang mga pagbabago sa Republic Act 11310 upang matugunan ang mga kakulangan na dulot ng magka-kakambal at hindi magkakatugmang programang ayuda. Ipinunto ni Lacson na habang napatunayang epektibo ang orihinal na 4Ps sa pagtulong sa mahihirap, nagdulot naman ng problema ang mga bagong pansamantalang programa—kabilang ang pagdodoble ng benepisyo, maling paggamit ng pondo, at pagkakasangkot sa pulitika.

“With the unprecedented expansion of ayuda programs, critics have branded us the moniker ‘ayuda nation,'” ani Lacson sa kanyang paliwanag. Binigyang-linaw niya na madalas ay nagkakaroon ng maling pananaw ang publiko, na ang mga tulong ay mula sa mga politiko imbes na sa pamahalaan mismo.

Bilang solusyon, isinusulong sa panukala ang paglikha ng “Pantawid Pag-asa,” isang karagdagang mekanismo sa ilalim ng 4Ps. Isasama rito ang mga umiiral na programa tulad ng AKAP, AICS, TUPAD, at Food STAMP upang matiyak ang maayos at makatarungang pamamahagi ng tulong, lalo na sa mga pamilyang pansamantalang naapektuhan ng mga krisis o emerhensiya—anuman ang kanilang antas ng kita.

Layunin din ng panukala ang pagtatatag ng isang pambansang database para sa mas pinagsama-samang sistema ng pagtukoy at pagsubaybay sa mga benepisyaryo. Sa ganitong paraan, mababawasan ang insidente ng pandaraya at dobleng pagkuha ng benepisyo.

Higit pa rito, may kalakip na probisyon ang panukala na magpapataw ng mabigat na parusa sa mga taong gagamit ng programang ayuda para sa layuning pulitikal. Sinumang mapatunayang lumabag ay habambuhay na pagbabawalang manungkulan sa alinmang posisyon sa gobyerno.

Iginiit ni Lacson ang pangangailangang maging mas responsable sa paggamit ng limitadong yaman ng estado at ang kahalagahan ng mga programang batay sa datos. “By institutionalizing evidence-based planning and development of programs, we will maximize benefits for the poor and eradicate political opportunism,” dagdag pa niya.

Sa kabuuan, layon ng panukala na gawing mas matatag, patas, at epektibo ang sistema ng ayudang panlipunan ng gobyerno—para sa mahihirap at maging sa mga panggitnang pamilyang madaling tamaan ng krisis pangkabuhayan.