Calendar
Pinay umuwi mula sa Singapore, arestado sa NAIA dahil sa kidnapping
ISANG Filipina na umuwi noong Rizal Day mula sa Singapore ang naaresto dahil sa matagal nang kasong may kaugnayan sa kidnapping, ayon sa mga opisyal nitong Biyernes.
Inaresto siya ng mga miyembro ng Philippine National Police (PNP) Aviation Security Group (Avsegroup), Criminal Investigation and Detection Group (CIDG), at Imus Component City Police Station sa pakikipag-ugnayan sa mga awtoridad ng Ninoy Aquino International Airport (NAIA).
Nahuli ang akusado sa loob ng airport complex at inabutan ng arrest warrant na inilabas laban sa kanya ng isang Family Court sa Cavite.
Ang kaso ay may kinalaman sa mga paratang ng kidnapping at hindi pagbabalik ng isang menor de-edad, kung saan malinaw na inirekomenda ng korte na walang piyansa.
Pagka-intercept sa kanya, agad na ipinaalam sa akusado ang mga paratang at ang kanyang mga karapatang konstitusyonal, alinsunod sa standard procedures ng pulisya.
Ang buong operasyon ay maayos na naidokumento upang matiyak ang transparency at pananagutan, ayon kay PNP Avsegroup Director Brigadier Gen. Dionisio B. Bartolome Jr.
Binigyang-diin ni acting PNP Chief Lieutenant Gen. Jose Melencio C. Nartatez Jr. na ang pag-aresto ay nagpapakita ng pangako ng PNP na ituloy ang mga kaso, saanman at gaano man katagal.
“This shows that accountability does not stop at our borders. If there is a lawful warrant, we will enforce it, calmly and properly. Airports are gateways, not escape routes,” aniya.
“May batang sangkot dito, kaya seryoso kami. Sisiguraduhin naming makarating sa korte ang kaso at may managot,” dagdag niya.
Sinabi ni Nartatez na ang koordinasyon ng mga yunit ng pulisya at mga katuwang na ahensiya ang susi sa tagumpay ng operasyon.
“When our units talk to each other and move as one, results follow. This is how policing should work — quietly, efficiently, and within the bounds of the law,” saad niya.
Matapos ang pag-aresto, ang suspek ay dinala sa NAIA Police Station 3 at kalaunan ay inilipat sa kustodiya ng CIDG Manila District Field Unit para sa dokumentasyon at karagdagang legal na proseso.
