PINADAPA ng Quezon Huskers ang Gensan Warriors, 86-82, habang itinumba ng Batangas City Tanduay Rum Masters ang Quezon City Galeries Taipan, 73-66, sa pagpapatuloy ng aksyon sa Manny Pacquiao presents 1xBet-MPBL 2025 Season sa Quezon Convention Center sa Lucena City.

Umskor si LJay Gonzales ng 12 sa kanyang 16 points sa fourth quarter, kabilang ang four straight free throws, upang maitakas ng Huskers ang kanilang ika-apat na dikit na panalo at 14-3 overall sa South division.

Overall, nasa fourth place ang Quezon sa round-robin elimination phase ng 30-team tournament kasunod ng North Division powerhouses Nueva Ecija (17-0), Abra Solid North (16-1) at San Juan (15-1)

Nagdagdag din si Gonzales ng 10 rebounds at five assists upang mahirang na “Best Player of the Game” laban kina Judel Fuentes, na may 22 points at two rebounds, at Joseph Gabayni, na may10 points at four rebounds

Ang Gensan, na bumaba sa 11-7 record, ay nakakuha ng 17 points, two rebounds at two assists mula kay Jeol Lee Yu, 14 points, 14 rebounds at four assists mula kay Kyle Tolentino, at 11 points, nine rebounds, two assists at two blocks mula kay Karwin Dionisio.

Samantala, sumandal ang Batangas City Tanduay Rum Masters sa husay ni Kenneth Ighalo sa fourth quarter upang biguin ang Quezon City Galeries Taipan at umakyat sa 11-7.

Nagpakawala si Ighalo ng 15 sa kanyang 21 points sa fourth period para tulungan ang Rum Masters na masungkit ang panalo.

Nagdagdag si Levi Hernandez ng 18 points, seven assists at three rebounds, habang nag-ambag si Dawn Ochea ng 11 points, three rebounds at two steals.

Bumagsak ang Quezon City sa record na 4-13 sa kabila ng 19 points ni Nino Ibanez, 12 poiints at 14 rebounds ni Edcel Rojas at 11 points ni Ry De La Rosa.

Si PBA legend Kenneth Duremdes ang commissioner.