KINUWESTYON ni Senator Panfilo “Ping” Lacson kung kabilang sa walong dating security personnel na ang mga sworn statement ay binanggit sa imbestigasyon ng Office of the Ombudsman laban kay former House Speaker Martin Romualdez at iba pang respondent ang apat na tinaguriang “Maleta Boys” na iniulat na nag-recant sa kanilang mga naunang pahayag.

“First question that needs to be answered is – are these four part or outside of the eight reported earlier to have submitted their sworn statements to the Ombudsman which triggered the initiation of the preliminary investigation against former Speaker Martin Romualdez, et al?,” sinabi ni Lacson.

Ayon sa mga naunang ulat na tumukoy kay Atty. Levito Baligod, nirepaso at nilagdaan ng walo ang kani-kanilang affidavit matapos silang isa-isang kapanayamin ng mga imbestigador ng Ombudsman.

Nauna ring sinabi ni Assistant Ombudsman Mico Clavano na itinuring ng mga imbestigador na categorical at consistent ang mga salaysay ng walo tungkol sa umano’y paghahatid ng pera na kinasasangkutan nina former Ako Bicol Rep. Elizaldy “Zaldy” Co at Romualdez.

Ayon din sa mga naunang ulat, kalaunan ay inatasan ng Ombudsman sina Romualdez at iba pang respondent na magsumite ng counter-affidavits.

Itinanggi ni Romualdez ang anumang wrongdoing at sinabi niyang sasagutin niya ang mga reklamo sa tamang proseso.

Kinuwestiyon ni Lacson ang magkakaibang salaysay ng mga miyembro ng grupo.

“Sa dami kasi ng flip-flopping statements nila sa iba’t-ibang fora at venues, hindi na natin alam kung ano na ang totoo at hindi sa mga sinasabi nila at kung sino-sino sa kanila ang nagsasabi ng totoo at hindi,” aniya.

Hindi pa natutukoy kung kabilang sa walong binanggit ng Ombudsman ang alinman sa apat na iniulat na nag-recant o kung aling bahagi ng kanilang mga naunang pahayag ang kanilang binawi.

Hiniling din ni Lacson sa mga awtoridad na alamin kung may sinumang responsable sa tinawag niyang kalituhan kaugnay ng mga witness.

“Dapat ding tugisin at papanagutin sa batas ang mga nasa likod ng gulo at confusion na nilikha nila. I hope the authorities will track and make them answerable as well,” sinabi niya.

Nauna nang kinuwestiyon ni Lacson ang lohika at arithmetic sa likod ng mga alegasyon kaugnay ng umano’y P805-bilyong cash-delivery scheme habang sinasabi niyang hindi pa siya nagbibigay ng pinal na paghatol sa merito ng mga testimonya.

Ayon sa mga naunang ulat, hiwalay na nagsampa ang Department of Justice ng cyberlibel at perjury cases laban sa mga miyembro ng grupo at kay Atty. Levito Baligod kaugnay ng kanilang joint sworn statement at mga kaugnay na pampublikong pahayag.

Hiwalay ang mga kasong isinampa ng DOJ sa flood-control investigation ng Ombudsman.