BINALAAN ni Senator JV Ejercito ang mga kontratista at opisyal ng Department of Public Works and Highways (DPWH) na ang patuloy na pagtanggi ay hindi magliligtas sa pananagutan sakaling mapatunayang sangkot sila batay sa mga dokumento at testimonya.

“Hindi puwedeng palusot ang ‘hindi ko alam.’ Nasa inyo ang proyekto, at kung ghost project ito, mananagot kayo,” aniya.

“Matinding sabwatan.”

Ito rin ang mariin niyang pahayag kung saan ay masusing ginisa ni Ejercito ang mga opisyal ng DPWH at mga kontratista kaugnay ng umano’y sabwatan para sa mga ghost projects at tinatawag na “tara system” sa pagdinig ng Senate Blue Ribbon Committee.

Ginisa ni Ejercito sina DPWH Engineer Brice Hernandez at dating DPWH Bulacan District Engineer Henry Alcantara kung paano nakalusot ang mga ghost project sa kanilang nasasakupan gayun sila ang dapat nagbubusisi sa mga proyektong tulad nito.

“District engineer ka, hindi mo alam na may ghost project?” tanong ng senador kay Alcantara, na tumangging may direktang kaalaman sa nawawalang mga proyekto. Ayon kay Ejercito, ang gayong pagtanggi ay nagpapahiwatig umano ng sabwatan at hindi ng simpleng kakulangan sa kaalaman.

Itinulak din ni Ejercito ang usapin na umano’y pagpapahiram ng lisensiya ng ilang kontratista para sa mga proyektong wala naman silang kapasidad na isagawa. Kinausap niya ang mga resource persons na umano’y konektado sa Discaya group kung nagsilbi bang “dummy” ang kanilang mga kumpanya kapalit ng porsiyento. “Pera ng tao ang ginagamit dito, tapos hindi niyo alam kung sino ang totoong gumagawa?” aniya.

Sa ilalim ng pagtatanong ni Ejercito, inilarawan ni Hernandez ang umano’y hatian ng kickback.

Forty porsiyento kay Alcantara, 20 porsiyento sa kanya, 20 porsiyento kay Engineer JP Mendoza, at 20 porsiyento kay Paul Tuya. Sinabi ng senador na ang testimonya ay nagpapalakas umano sa matagal nang hinala ng sistemikong korupsiyon, kung saan hinahati ng ilang opisyal at kontratista ang pondo sa halip na tapusin ang mga proyekto.

Nang ilahad ang testimonya hinggil sa karaniwang “SOP” na porsiyento—anim na porsiyento para sa Bids and Awards Committee, 8.5 porsiyento para sa flood-control projects, at hanggang 30 porsiyento para sa proponents—sinabi ni Ejercito na pinagtitibay umano nito ang mga pahayag ni Hernandez at ipinakikitang malalim ang pagkakaugat ng problema.

Higit pang iginiit ni Ejercito ang tanong kay Alcantara tungkol sa mga mamahaling gamit na umano’y naihatid sa kanya, kabilang ang mga sasakyan. Inamin ni Alcantara na tumanggap siya ng isang Toyota Land Cruiser at isang GMC truck, ngunit itinanggi niyang ito’y suhol. Tanong ng senador kung bakit iaalok ang ganoong kamamahaling bagay, na aniya’y malinaw na mga “red flag” ng umano’y influence-peddling.