SINABI ni dating Speaker Ferdinand Martin G. Romualdez nitong Lunes na pinaninindigan niya ang kanyang kawalang-sala at handa siyang harapin ang mga kasong isinampa laban sa kanya kasunod ng desisyon ng Sandiganbayan na ilipat siya mula sa Cardinal Santos Medical Center sa kustodiya ng Bureau of Jail Management and Penology (BJMP).

“Ginagalang ko ang desisyon ng Sandiganbayan,” ani Romualdez.

Nagpasalamat siya sa kanyang mga doktor sa Cardinal Santos Medical Center at sa mga doktor ng Philippine General Hospital (PGH) sa kanilang pangangalaga at propesyonal na pagpapasya.

“Patuloy kong susundin ang mga payong medikal ng aking mga doktor,” aniya.

Binigyang-diin ni Romualdez na hindi nagbabago ang kanyang paninindigan sa mga kasong kinakaharap niya dahil lamang sa pagbabago ng lugar kung saan siya ikinukulong.

“Palagi kong sinasabi na haharapin ko ang mga kasong isinampa laban sa akin at sasagutin ang mga ito sa harap ng nararapat na hukuman. Hindi iyon nagbago,” aniya.

“Pinaninindigan ko ang aking kawalang-sala. Haharapin ko ang kaso. Sasagutin ko ang mga paratang.”

Kinikilala ng dating Speaker ang hirap na idinudulot ng pangyayaring ito sa kanya at sa kanyang pamilya, ngunit sinabi niyang haharapin niya nang may dignidad ang mga susunod na araw.

“Mahirap ang panahong ito para sa akin at sa aking pamilya. Ngunit haharapin ko ang mga susunod na araw nang may dignidad, pananampalataya sa Diyos, at tiwala sa katotohanan,” ani Romualdez.