PINALAKAS ng tatlong beses ng Police Regional Office 7 (PRO7) ang seguridad ni Gobernador Pam Baricuatro ng Cebu dahil sa umano’y mga banta sa kanyang buhay, ayon kay Philippine National Police (PNP) spokesperson Brigadier General Randulf T. Tuaño nitong Lunes.

Sinabi ng opisyal na iniutos din ni PNP chief General Jose Melencio C. Nartatez Jr. kay PRO7 director Brig. Gen. Redrico A. Maranan na magsagawa ng masusing imbestigasyon hinggil sa iniulat na mga “death threat” laban sa gobernador.

Ayon kay Brig. Gen. Tuaño, iniulat ni Gov. Baricuatro ang mga banta sa kanyang buhay noong Biyernes sa pamamagitan ng kanyang personal na social media account. Isang assistant ng gobernador ang nagsabing nakatanggap sila ng impormasyon mula sa isang kaibigang pareho nila na may isang “hired killer” umano mula sa Mindanao na inalok ng ₱2.5 milyon upang paslangin ang pinakamataas na opisyal ng Cebu.

“Kinokondena ng PNP ang anumang banta sa buhay ng sinumang indibidwal, lalo na ng mga halal na opisyal. Kaya naman iniutos ng Chief, PNP sa PRO7 na imbestigahan ang insidente, tukuyin ang pinagmulan nito, at magsampa ng kaso laban sa sinumang mapatunayang responsable sa banta,” pahayag ng PNP spokesperson.

Dagdag pa ni Brig. Gen. Tuaño, bunsod ng insidente ay may kabuuang 14 na pulis mula sa PRO7 Regional Mobile Force Battalion ang itinalaga upang magbigay ng seguridad kay Baricuatro. Pito sa mga ito ang magbabantay sa opisyal sa loob ng isang araw at papalitan ng iba pang pito kinabukasan. Bago ito, dalawa lamang ang police security ng gobernador.

Sinabi ni Gen. Nartatez na ang kaparehong hakbang sa seguridad ay ipinatutupad din para sa lahat ng mga opisyal ng pamahalaan na nakararanas ng kaparehong pananakot at banta habang ginagampanan ang kanilang tungkulin.