Nanatiling mahigpit ang seguridad sa paligid ng Malacañang sa Maynila at EDSA Shrine sa Quezon City nitong Biyernes, Hulyo 3, kahit natapos na ang tatlong araw na kilos-protesta ng Iglesia ni Cristo (INC) sa Liwasang Bonifacio.

Ayon kay PNP chief Gen. Jose Melencio Nartatez Jr., sa pangkalahatan ay naging mapayapa at maayos ang isinagawang public assembly ng grupo na nagsimula noong Hunyo 30.

Inamin naman ng hepe ng PNP na may ilang maliliit na insidenteng naitala sa unang araw ng protesta, ngunit agad umano itong naaksyunan alinsunod sa umiiral na batas at standard operating procedures.