ISINUSULONG ni Senador Joel Villanueva ang isang sistema na kikilala sa professional training, kasanayan at karanasan sa trabaho upang makaangat ang mga Pilipino nang hindi inuulit ang mga qualification na nakuha na nila.

Layunin ng Senate Bill No. 2313 na itatag ang Career Progression and Specialization Program and Credit Accumulation and Transfer System o CPSP-CATS.

Kikilalanin sa ilalim ng panukala ang credits mula sa edukasyon, training at professional practice para sa career advancement, specialization at certification.

“Every training completed, every competency developed, and every experience gained should help Filipinos move forward in their careers,” sinabi ni Villanueva.

“Through the proposed CPSP-CATS, professionals will have clearer pathways to advance, specialize, and earn certifications with corresponding Philippine Qualifications Framework levels without having to start over whenever they pursue career growth,” dagdag niya.

Sinabi ni Villanueva na sinusuportahan ng mga umiiral na batas ang professional development ngunit wala pang iisang sistema para sa pagkilala at paglilipat ng skills at professional credits sa iba’t ibang propesyon.

Sa ilalim ng panukala, bubuo ang Professional Regulation Commission, sa konsultasyon sa Civil Service Commission, ng career progression at specialization programs para sa 46 regulated professions.

Aatasan din ang PRC na mag-accredit ng specialty training providers, mangasiwa sa pagpapatupad at magtakda ng mga patakaran sa pagkilala at paglilipat ng learning at professional-practice credits.

Sinabi ni Villanueva na makatutulong ang panukala sa mga manggagawang nais palakasin ang kanilang qualification at umangkop sa nagbabagong pangangailangan ng mga industriya.

Binanggit niya ang mga datos na nagpapakitang humigit-kumulang 2.5 milyong Pilipino ang walang trabaho noong Mayo 2026, habang mahigit anim na milyong manggagawa ang underemployed at naghahanap ng mas magandang oportunidad.

“These figures underscore the need for policies that help professionals strengthen their qualifications, develop specialized competencies, and improve their career prospects,” sinabi ni Villanueva.

“This bill is about giving Filipinos more opportunities. By recognizing skills and competencies, we empower workers to grow in their careers, boost productivity, and contribute more to their families and to nation-building,” dagdag niya.