SA boto ng 15 senador, tinanggal si Francis “Chiz” Escudero bilang Senate President at pinalitan ni Vicente “Tito” Sotto III noong Lunes.

Bumalik si Sotto sa puwestong hinawakan niya mula 2018 hanggang 2022, matapos niyang palitan si Escudero na siyang nagpatalsik kay Juan Miguel “Migz” Zubiri noong Mayo 2024.

Sumama sa bagong mayorya ni Sotto ang mga dating minorya na sina Risa Hontiveros, Panfilo Lacson, Loren Legarda, at Zubiri. Ayon sa ulat, si Lacson ay itatalaga bilang Senate President Pro Tempore, habang si Zubiri ay muling mauupo bilang majority leader.

Pamumunuan ni Escudero ang bagong minorya na binubuo ng mga kaalyado ni Duterte na sina Ronald “Bato” dela Rosa, Christopher “Bong” Go, Imee Marcos, at Robinhood Padilla.

Naganap ang pagbabago habang nagpapatuloy ang mga pagdinig sa umano’y iregularidad sa mga flood control project, na nagpalala sa banggaan ng mga senador.