ISANG mananaya sa San Roque, Cabiao, Nueva Ecija ang nanalo ng P366.68 milyong jackpot prize ng UltraLotto 6/58.

Batay sa inilabas na datos ng Philippine Charity Sweepstakes Office (PCSO), isa lang ang nakakuha ng winning number combination na 43 – 58 – 37 – 47 – 27 – 17.

Mayroon namang 92 mananaya na nanalo ng tig-P120,000.

Tig-P2,000 naman ang 3,793 mananaya na nakaapat na numero at tig-P100 ang 44,780 mananaya na nakatatlong numero.

Ang mga nanalo ay mayroong isang taon para kunin ang kanilang premyo.

Ang premyo na mahigit P10,000 ay pinapatawan ng 20 porsyentong buwis.