TALAVERA, Nueva Ecija–Isang tubero ang naaresto sa aktong nagbebenta ng baril sa halagang P7,000 noong Lunes sa Brgy. Calipahan ng bayang ito.

Kinilala ni P/Lt. Col. Rogelio Pacificar Jr., hepe ng pulisya, ang naarestong suspek na 36-anyos na binata at residente ng Brgy. La Torre, Talavera, Nueva Ecija.

Ayon sa ulat kay Nueva Ecija police chief P/Col. Heryl Bruno, dinakip ang suspek matapos iabot ang magnum .357 revolver kapalit ng P7,000 sa isang police poseur-buyer dakong alas-12:30 ng hatinggabi.

Nakumpiska din sa kanya ang isang pocket knife.

Kasong paglabag sa RA 10591 (Comprehensive Firearms and Ammunition Regulation Act) ang isasampa sa suspek.