KINUWESTYON ni Senator-Judge Joel Villanueva nitong Biyernes kung paano nakapagtala ng P208.49 milyong benta ang Cale88 Foods Corp. mula 2021 hanggang 2025 sa kabila ng kakaunting empleyado at mga pagkaluging iniulat ng kumpanya.

Sa ika-37 araw ng impeachment trial ni Vice President Sara Duterte, sinuri ng Senado ang mga rekord ng Cale88, isang kumpanyang nag-e-export ng banana chips at may kaugnayan sa kanyang asawang si Atty. Manases Carpio.

Inilahad ni Atty. Anne Loraine Garcia-Marquez, chief of staff ng commissioner ng Bureau of Internal Revenue (BIR), ang mga rekord ng buwis na nagpapakita ng kabuuang benta ng kumpanya sa loob ng limang taon.

Tinanong ni Villanueva kung paano naipagpatuloy ng Cale88 ang operasyon sa kabila ng mga iniulat na pagkalugi at kung sino ang nagpasiyang ipagpatuloy ang negosyo.

Batay sa mga rekord na tinalakay sa pagdinig, umabot sa humigit-kumulang P150 milyon ang benta ng Cale88 noong 2024, ngunit wala itong nakalistang rank-and-file employees sa naturang taon.

Dalawang empleyado naman ang iniulat nito noong 2025.

Inusisa ni Villanueva ang bilang ng mga empleyado kaugnay ng laki ng benta at mga gastos sa operasyon ng kumpanya.

Nauna nang tumestigo si Anti-Money Laundering Council (AMLC) Executive Director Atty. Ronel Buenaventura na umabot sa P1,254,736,297.08 ang pinagsama-samang covered at suspicious transactions ng Cale88 mula 2022 hanggang 2025.

Ayon kay Buenaventura, P776.64 milyon sa kabuuang halaga ang naitalang pumasok sa kumpanya.

Ang P1.25 bilyon ay kabuuang halaga ng mga iniulat na transaksyon, hindi kita ng kumpanya o pondong napatunayang nagmula sa ilegal na gawain.

Nakatanggap din ang Cale88 ng humigit-kumulang P319.33 milyong remittances mula sa China at Hong Kong, batay sa mga rekord na tinalakay sa pagdinig.

Samantala, inusisa ni Senator-Judge Risa Hontiveros ang isang kumpanyang nakarehistro sa Ukraine na nagpadala umano ng pera sa Cale88.

Iniugnay ni Hontiveros ang dayuhang kumpanya sa mga alegasyon ng fraud at money laundering. Hindi pa napapatunayan sa impeachment court na sangkot ang Cale88 sa mga ilegal na gawaing iniuugnay sa naturang kumpanya.

Sa mga naunang pagdinig, kinuwestiyon din ni Hontiveros ang ilang kumpanyang Tsino na nagpadala ng pera sa Cale88, kabilang ang mga iniugnay niya sa mga negosyong pag-aari ng pamahalaan ng China.

Hiwalay na sinuri ng impeachment court ang iniulat na pagbebenta ng shares ni Carpio sa Cale88.

Sinabi ni Garcia-Marquez noong Huwebes na walang nakitang rekord ang BIR ng pagbebenta o paglilipat ng shares ni Carpio, gayundin ng electronic Certificate Authorizing Registration at kaugnay na pagbabayad ng buwis.

Kinuwestiyon ng prosekusyon ang iniulat na paglilipat ng shares ni Carpio sa Pikimong Pikimong Inc.

Kinontra ni defense counsel Atty. Kristine Ferrer ang pahayag ni prosecutor Atty. Erwin Matib na hindi tunay ang bentahan, dahil hindi pa ito napapatunayan sa testimonya ng BIR.

Pinaboran ni Presiding Officer Sen. Francis Escudero ang pagtutol at ipinabura sa rekord ang naturang pahayag ni Matib.

Batay sa corporate records na tinalakay sa pagdinig, nakalista si Carpio bilang shareholder ng Cale88 mula 2021 hanggang 2024. Umabot sa 47.5 porsiyento ang kanyang iniulat na bahagi sa kumpanya noong 2024.

Hindi pa napagpapasyahan ng impeachment court kung tunay ang iniulat na bentahan ng shares o kung may naganap na paglabag sa batas.

Bahagi ang pagsusuri sa Cale88 ng Article II ng impeachment complaint laban kay Duterte, na tumatalakay sa mga alegasyon ng unexplained wealth, hindi kumpletong deklarasyon ng ari-arian at mga interes sa negosyo.

Wala pang pinal na pasya ang impeachment court na nagpapatunay na nagmula sa ilegal na gawain ang mga pondong natanggap ng Cale88 o na personal na tumanggap sina Duterte at Carpio ng ilegal na pera.