GINANAP ang 50th People’s Caravan: “Serbisyong Dala ay Pag-Asa” sa Brgy. Macabalan covered court na dinaluhan ng halos 2,000 benepisyaryo na dulot ng National Housing Authority (NHA) at Cagayan de Oro City.

Ang caravan, na isa sa mga inisyatiba ni NHA General Manager Joeben A. Tai, ay pinangunahan nina Region X Officer-in-Charge Engr. Maria Fe Pantanosas, Cagayan de Oro/Misamis Oriental/Camiguin District Officer-in-Charge Ar. Maria Madelyn T. Madrid at Mayor Rolando “Klarex” Uy na kinatawan ni City Administrator Atty. Roy Hilario P. Raagas.

Bago ang pagsisimula ng caravan, naggawad ang NHA ng certificates of award para sa limang benepisyaryo ng NHA Macabalan-Puntod Slum Improvement and Resettlement (MaPu SIR) Project na magbibigay sa kanila ng security of tenure at katunayan ng ganap na pagmamay-ari ng kanilang kabahayan.

Nagbigay ng libreng serbisyong medikal at dental ang Department of Health (DOH), Philippine Air Force (PAF), Philippine National Police (PNP) Health Service Region X, Philippine Red Cross (PRC) CDO at CDO City Health Office.

Nagsagawa ang Technical Education and Skills Development Authority (TESDA) ng skills demonstration at information desk ukol sa mga scholarship grants ng ahensya; nagsagawa ang Department of Trade and Industry (DTI) ng oryentasyon tungkol sa business counseling, pagpaparehistro ng pangalan ng negosyo, at barangay micro-business enterprise; at naroon din ang Department of Migrant Workers (DMW) para sa tulong-pangkabuhayan ng mga kwalipikadong OFW returnees.

Nagbenta ang Department of Agriculture (DA)-AMAD ng mga murang produktong pang-agrikultura at bigas sa pamamagitan ng KADIWA on Wheels; nagbigay ang Department of Environment and Natural Resources (DENR) ng mga native tree at bamboo seedlings; at nagsagawa ang City Social Welfare and Development Office (CSWDO) ng aplikasyon para sa pagiging miyembro ng mga sektor tulad ng PWD, Senior Citizen, at Solo Parent.

Nagbigay din ng serbisyo para sa pagpaparehistro ng mga opisyal na dokumento at valid IDs ang iba’t ibang ahensya tulad ng Philippine Statistics Authority (PSA), Philippine National Police (PNP) Regional at CDO Police Offices, PhilHealth, Social Security System (SSS), at Pag-IBIG Fund.

Nagbigay rin ng logistical at manpower assistance ang Cagayan de Oro LGU at Brgy. Macabalan LGU.