MAHIGIT P1.4 milyong halaga ng shabu ang nakumpiska ng pulisya sa tatlong magkakabarkada sa ginawang buy-bust operation, araw ng Martes sa Paranaque City.

Pinalibutan kaagad ng mga tauhan ni Southern Police District (SPD) Director P/BGen. Joseph Arguelles sina alyas “Ace”, 19, alyas “MJBC”, at alyas “Wawa”, kapuwa 21-taong gulang nang tanggapin ang markadong salapi na ibinayad ng police poseur-buyer, kapalit ng sachet na naglalaman ng shabu.

Isinagawa ng Paranaque police, sa pamumuno ni P/Col. Melvin Montante, ang buy-bust operation madaling araw ng Martes sa Brgy. San Antonio matapos ang ilang araw na paniniktik sa kanilang ilegal na aktibidad.

Nasamsam sa tatlo ang kabuuang 219 gramo ng shabu na may katumbas na halagang P1,428,000.00, pati na ang markadong salapi, sling bag, at mobile phone na gamit nila sa ilegal na transaksiyon.

“This operation reflects SPD’s sustained drive to disrupt the illegal drug trade in close coordination with the directives of our Chief PNP and RD NCRPO. Our intensified operations will continue to target individuals and networks responsible for distributing these harmful substances in our communities,” pahayag ni BGen. Arguelles.