UMAKYAT na sa lima ang bilang ng mga nasawi dulot ng bagyong ‘Crising’ nitong Lunes, habang pito pa ang naiulat na nawawala, ayon sa mga opisyal ng pulisya at disaster rescue.

Ayon sa National Disaster Risk Reduction and Management Council (NDRRMC), umakyat din sa lima ang bilang ng mga nasugatan.

Sinabi rin ng NDRRMC na ang malalakas na pag-ulan at hangin na dala ng bagyo ay nakaapekto sa 22,985 pamilya o katumbas ng 800,865 indibidwal, kung saan mahigit 20,000 ang nananatili pa rin sa mga evacuation center na pinapatakbo ng pamahalaan.

Ayon kay Philippine National Police chief General Nicolas D. Torre III, nagpakalat na sila ng 2,600 pulis para sa disaster response, habang mahigit 7,000 pulis naman ang naka-standby at handang i-deploy sa mga apektadong lugar kung kakailanganin.

Dagdag pa ng hepe ng PNP, anim na ang naiulat na nawawala at anim din ang nasugatan sa kabila ng patuloy na sakripisyo ng mga pulis na sumuong sa panganib upang iligtas ang mga nasalanta sa iba’t ibang bahagi ng Ilocos-Pangasinan, Cagayan Valley, Calabarzon, Mimaropa, Western Visayas, Caraga, at Cordillera regions.