NANAWAGAN sina Minority Leader Vicente C. Sotto III at anim pang senador ng mas malinaw at bukas na proseso sa pagtalakay sa pambansang badyet, kasunod ng mga ulat ng umano’y iregularidad sa 2025 General Appropriations Act (RA 12116).

Sa isinampang Senate Joint Resolution No. 1 noong Hulyo 29, iginiit ng mga senador na dapat buksan sa publiko ang lahat ng pagpupulong ng bicameral conference hinggil sa badyet—sa pamamagitan ng pisikal na pagdalo o digital livestream.

Kasama ni Sotto sa mga may-akda ng resolusyon sina Senators Panfilo Lacson, Risa Hontiveros, Loren Legarda, Juan Miguel Zubiri, Francis “Kiko” Pangilinan, at Bam Aquino.

Iminungkahi rin ng grupo ang pagpapalabas ng detalyadong talaan na nag-uugnay at naghahambing sa mga bersyon ng Senado at Kamara ng panukalang badyet, upang malinaw na makita kung paano isinasaayos ang mga hindi pagkakatugma. Dagdag pa rito, iginiit nilang dapat agad na ilathala ang buong transcript ng mga pagpupulong, nang walang pagbabago o pagtatago.

Binigyang-diin ng mga senador na ang mga saradong talakayan ay nagiging daan para sa mga biglaang pagbabago at pulitikal na singit sa badyet, na kalauna’y maaaring mauwi sa maling paggamit ng pera ng taumbayan. Sa kanilang pananaw, ang pagbubukas ng proseso ay susi sa pagbabalik ng tiwala at pagtibay ng mga demokratikong prinsipyo.

“We owe it to the Filipino people to show transparency on how the taxes are allocated. Let the public see what we’re doing. That’s the least we can do in a democracy,” ani Sotto.

Sa gitna ng tumitinding panawagan para sa reporma sa mga proseso sa paggawa ng batas, binigyang-babala ng mga senador na kung mananatili ang kasalukuyang sistema, patuloy itong magiging bulnerable sa pang-aabuso at mawawala ang tiwala ng mamamayan sa pamahalaan.