ISANG biyudo na inakusahan ng pang-aabusong seksuwal sa kanyang 5-taong gulang na anak na babae sa loob ng kanilang bahay sa Quezon, Bukidnon, ang naaresto ng mga operatiba ng Philippine National Police Criminal Investigation and Detection Group (PNP‑CIDG), ayon sa impormasyong nakalap ng Journal Group nitong Martes.

Ayon kay PNP‑CIDG Director Major General Robert Alexander A. Morico II, ang 39‑anyos na suspek, na ikasiyam sa listahan ng most wanted persons sa Bukidnon, ay naaresto batay sa isang non‑bailable arrest warrant para sa qualified rape ng menor de-edad at sexual assault na inisyu ng regional trial court ng Malaybalay City noong Enero 16.

Sinabi ng opisyal na natunton ng mga tauhan ng CIDG Bukidnon Provincial Field Unit at lokal na pulisya ang suspek matapos makatanggap ng impormasyon mula sa mga concerned citizen.

Ayon kay Morico, noong Oktubre 17, 2025, humingi ng tulong sa Quezon Municipal Police Station ang tiyahin ng biktima upang habulin ang suspek.

Kasunod nito ay nagsampa ng kasong kriminal laban sa suspek na nagresulta sa paglalabas ng arrest warrant.

Pinuri ng PNP‑CIDG director sina Colonel Jonathan Papay at Lieutenant Colonel Ian Datiles para sa matagumpay na pag-aresto sa akusado.

“This underscores the CIDG’s commitment in protecting and helping women and children from all types of abuse and violence, most especially rape of a minor, and incest rape. The capture of the father is the start of the turning of wheels of justice for the pitiful innocent child,” aniya.