BANDANG alas-7:00 ng gabi noong Enero 24, 2026, nagsagawa ng rescue operation ang mga tauhan ng San Nicolas Police Station sa ilalim ng direktang pangangasiwa ni PMaj. George D. Banayos Jr., ACOP, katuwang ang MDRRMO San Nicolas at mga opisyal ng barangay, para sa tatlong mag-aaral ng Red Arrow National High School na naiulat na nawawala habang nagha-hiking sa Pising-Bato, Brgy. San Felipe East, San Nicolas, Pangasinan.

Ayon sa ulat, nagtungo ang mga estudyante sa lugar bandang alas-3:00 ng hapon at naligaw dahil sa hindi pamilyar na terrain at sa matataas na damong cogon.

Matapos matanggap ang ulat, agad na kumilos ang mga awtoridad at ginamit ang ibinahaging grid coordinates ng mga estudyante upang gabayan ang paghahanap.

Bandang alas-10:17 ng gabi, matagumpay na natagpuan ang mga estudyante na ligtas at may bahagyang galos lamang.

Dinala sila sa Brgy. San Felipe East Outpost kung saan binigyan ng pagkain at tulong. Nagsagawa rin ng briefing kasama ang mga estudyante at kanilang mga magulang upang maiwasan ang mga kahalintulad na insidente sa hinaharap.

Opisyal na tinapos ang rescue operation bandang alas-12:20 ng madaling araw ng Enero 25, 2026, na may matagumpay na resulta.

Pinaaalalahanan ng PNP ang publiko na mag-ingat sa pagha-hiking, iwasan ang paglalakbay nang gabi, at laging ipaalam sa mga awtoridad o kapamilya ang mga plano sa paglalakbay.