“IT is our constitutional duty.”

Ito ang iginiit ni Senator Joseph Victor “JV” G. Ejercito habang nililinaw na mali ang pagkakaunawa sa kanyang naunang pahayag na tila pagkontra sa impeachment, at binigyang-diin na nananatiling tungkulin sa ilalim ng Konstitusyon ng bawat senador na umupo bilang hukom sakaling maipasa sa Senado ang isang impeachment case.

Ayon kay Ejercito, ang kanyang naging pahayag ay tugon sa pangamba na ang matagal na bangayang pulitikal ay maaaring makapagpabagal sa kaunlaran ng bansa, at hindi paghatol nang maaga sa anumang posibleng kaso.

“Whether we are for it or not, it’s our duty to perform, it’s our duty to function as an impeachment court, as senator judges,” he said.

Binigyang-diin ng senador na sa sandaling iendorso ng House of Representatives ang articles of impeachment, nakatali ang mga senador sa Konstitusyon na kumilos bilang mga patas na hukom at suriin ang ebidensyang ihaharap.

“Siyempre dapat hindi ang personality ang tinitignan natin dito. When you serve as impeachment judge, you have to be fair. Kailangan tinignan mo ang ebidensya, with sufficient grounds, then you decide from there,” Ejercito said.

Ipinaliwanag niya na ang kanyang pag-aalala ay nakatuon sa agwat ng pag-unlad ng Pilipinas kumpara sa mga karatig-bansa sa Southeast Asia.

“If we are 30 years behind now in terms of infrastructure and other developments sa iba nating karatig bansa like Indonesia, Malaysia, Thailand, and now Vietnam is fast growing, baka madagdagan pa na another 2-5 years na naman tayong mapag-iwanan,” he said.

Nagbabala si Ejercito na ang isang mahabang proseso ng impeachment — laban man sa Pangulo o sa Bise Presidente — ay maaaring maglihis ng atensyon mula sa mga agarang prayoridad ng bansa at posibleng makapagpabagal sa takbo ng ekonomiya.

Idinagdag niya na kung magpapatuloy ang impeachment proceedings, umaasa siyang matatapos ito sa lalong madaling panahon upang makabalik ang mga mambabatas sa pagtutok sa mas mahahalagang usapin.

“Kaya parang sana pagkatapos na ito, maging mabilis, we go back to the big problems or challenges. Food security, tumataas na presyo ng pagkain,” he said.

Tinukoy ng senador ang economic development, food security at abot-kayang serbisyong pangkalusugan bilang mga pangunahing isyung nangangailangan ng tuluy-tuloy na atensyon ng lehislatura, at binanggit na ang mga ito ay direktang nakaaapekto sa karaniwang Pilipino.

Iginiit ni Ejercito na habang kailangang gampanan ng Senado ang tungkuling itinakda ng Konstitusyon kung kinakailangan, dapat manatiling nakatuon ang pamamahala sa pangmatagalang kaunlaran at pagpapabuti ng pang-araw-araw na buhay ng mamamayan.