INIUTOS ng Senado, na nakaupo bilang Impeachment Court, ang paglalabas ng writ of summons kay Vice President Sara Duterte at inatasan siyang sagutin ang Articles of Impeachment sa loob ng non-extendable period na 10 calendar days mula sa pagtanggap nito.

Inilabas ni Senate President Alan Peter Cayetano ang direktiba matapos mag-convene ang Senado bilang Impeachment Court at matapos manumpa ang mga senator-judge na gagampanan nila ang “impartial justice according to the Constitution and laws of the Philippines.”

Nauna nang ini-refer ang Articles of Impeachment laban kay Duterte sa Committee on Rules bago inaprubahan ng kapulungan ang mosyon na i-refer ito sa Impeachment Court.

Ipinaabot ni Acting Majority Leader Joel Villanueva sa rekord na personal na dinala ng House of Representatives, sa pamamagitan ni Secretary General Cheloy Garafil, ang Articles of Impeachment laban kay Duterte sa Senado noong May 14.

Sinabi ni Cayetano na maaaring maghain ng reply ang prosecution sa loob ng non-extendable period na limang calendar days mula sa pagtanggap ng sagot ng Bise Presidente.

Tinanong ni Senator Vicente “Tito” Sotto III kung ang 10 araw para sa sagot ni Duterte at ang limang araw para sa reply ng prosecution ay working days o calendar days. Sinagot ni Cayetano na parehong calendar days ang bilang.

Pinayagan din ng impeachment court ang paghahain ng pleadings at annexes nang personal o sa pamamagitan ng electronic mail, habang maglalabas pa ng tiyak na instructions para sa mga partido.

Inatasan ni Cayetano ang Clerk of Court na i-calendar ang kaso para sa pre-trial matapos maihain ang huling pleading. Sinabi niya na magsisimula ang trial proper sa petsa at oras na itatakda ng korte matapos ang pre-trial.

“In pursuit of impartial justice, we will come up with an impeachment calendar that is fair to the prosecution and to the defense and will allow us to continue to function in the legislative side of our work,” sabi ni Cayetano.

Bago mag-convene ang impeachment court, sinagot din ni Cayetano ang mga tanong kaugnay ng acting status ng Committee on Rules matapos ang reorganization ng Senado. Sinabi niya na si Villanueva ang acting chair ng komite habang inaayos pa ng kapulungan ang permanent committee membership.

Kalaunan, muling nag-session ang Senado at tinalakay ang ilang committee chairmanship bago mag-adjourn hanggang alas-3 ng hapon ng Martes, May 19.