SINABI ni Senator Panfilo “Ping” Lacson na nagdulot sa kanya ng “double relief” ang pag-alis niya sa Senate Blue Ribbon Committee, ngunit iginiit niyang magpapatuloy ang kanyang pagtutok sa pananagutan kaugnay ng umano’y korapsyon at maling paggamit ng pondo ng bayan.

Ginawa ni Lacson ang pahayag matapos italaga si Senator Pia Cayetano bilang bagong chairperson o pinuno ng Senate Blue Ribbon Committee, na humahawak sa mga imbestigasyon kaugnay ng umano’y iregularidad sa flood control projects.

“After Sen. Pia Cayetano was named as the new chairperson of the Senate Blue Ribbon Committee, I felt some sense of relief. Make that double relief,” ani Lacson.

Ayon kay Lacson, ang pagpapalit sa liderato ng komite ay nagligtas sa kanya sa sitwasyong kailangan niyang mag-inhibit o mag-recuse sakaling hingan siya ng testimonya kaugnay ng kanyang privilege speech tungkol sa umano’y iregularidad sa flood control projects.

“First, I do not have to inhibit or recuse myself when asked to testify regarding the privilege speech that I delivered,” aniya.

Ayon sa kanyang tanggapan, ang komite, sa ilalim ng kanyang pamumuno, ay nakatulong sa case buildup efforts kaugnay ng mga reklamong isinusulong sa Department of Justice at iba pang ahensya.

Sinabi ni Lacson na hindi matatapos ang kanyang kampanya laban sa korapsyon sa pag-alis niya bilang pinuno ng Blue Ribbon Committee, lalo na sa mga isyung may kinalaman sa paggamit ng pondo ng publiko.

“Second, I can now focus on other issues involving a corrupt and rotten system, especially involving the misuse and abuse of public funds,” ani Lacson.

Ang Blue Ribbon Committee ay isa sa mahahalagang investigative panel ng Senado na tumitingin sa mga usapin ng pananagutan sa pamahalaan, mga opisyal ng gobyerno, at mga alegasyon ng maling paggamit ng pondo ng bayan.

Ang pagpapalit sa liderato ng komite ay bahagi ng patuloy na reorganisasyon ng Senado matapos ang mga pagbabago sa pamunuan at committee assignments ng kapulungan.

Iginiit ni Lacson na magpapatuloy ang kanyang pagtutok sa pananagutan kahit wala na siya sa pamumuno ng Blue Ribbon Committee.