HINIMOK ni Deputy Speaker Paolo Ortega V ng La Union nitong Lunes ang mga opisyal ng Gabinete na nahaharap sa sunod-sunod na reklamo at akusasyon na manatiling nakatuon sa pamamahala, at sinabing hindi dapat gambalain ng mga pag-atakeng pampulitika ang serbisyo publiko o pahinain ang mga institusyon ng gobyerno.

Inilabas ni Ortega ang pahayag sa gitna ng aniya’y lumalalang padron ng mga harassment suit at mga akusasyong may bahid pulitika laban sa mga miyembro ng Gabinete ni Pangulong Ferdinand R. Marcos Jr.

Partikular niyang binanggit ang kasong isinampa laban kay Executive Secretary Ralph Recto, na inaakusahan itong personal na nakinabang mula sa paglilipat ng humigit-kumulang P60 bilyong pondo ng PhilHealth sa Department of Budget and Management, na kalaunan ay ibinalik din ng gobyerno.

“Sa public service, lalo na sa matataas na posisyon, hindi mawawala ang batikos, intriga at mga reklamong ang tunay na layunin ay guluhin ang trabaho ng gobyerno at sirain ang kredibilidad ng mga opisyal,” ani Ortega.

“Pero huwag magpatinag. Tuloy lang ang trabaho at serbisyo para sa taumbayan,” dagdag niya.

Binigyang-diin ni Ortega na hindi dapat ituring na katibayan ng pagkakasala ang simpleng paghahain lamang ng reklamo.

“Ang pagsasampa ng reklamo ay hindi awtomatikong nagpapatunay ng pagkakasala. Sa isang demokrasya, mahalaga ang pananagutan, ngunit mahalaga rin ang pagiging patas,” aniya.

“Ang mga alegasyon ay dapat laging sinusuri batay sa mga katotohanan, ebidensya, at wastong proseso,” dagdag pa niya.

Binigyang-diin din ng lider ng Kamara ang kahalagahan ng paghihiwalay ng mga desisyong institusyonal sa mga akusasyon ng personal na katiwalian.

“Sa kasong kinasasangkutan ng Executive Secretary, mahalagang maiba ang mga desisyong pampatakaran na ginawa ng mga institusyon at ang mga alegasyon ng personal na pagpapayaman laban sa mga indibidwal,” sabi ni Ortega.

“Kung ang mga pondong pinag-uusapan ay nailipat nang naaayon sa batas, naitala nang maayos, at kalaunan ay naibalik, kung gayon ay dapat malinaw itong mapatunayan ng mga kaukulang awtoridad at mga dokumentaryong rekord sa isang obhetibong paraan,” dagdag niya.

Sinabi ni Ortega na dapat magpatuloy ang mga opisyal ng Gabinete sa pakikipagtulungan sa mga legal na proseso habang nananatiling nakatuon sa kanilang mandato.

“Ang pinakamahalaga ay hindi nahihinto ang serbisyo ng gobyerno dahil sa mga reklamong ginagamit para manggulo o magpasikat,” aniya.

“Sa huli, katotohanan pa rin ang mananaig, hindi propaganda at hindi paninira,” dagdag ni Ortega.