MAY quorum ang Senado upang ituloy ang June 17 special session at hiniling ng Cayetano bloc sa Supreme Court na ipawalang-bisa ang June 3 session na nagluklok ng bagong liderato ng Senado, ayon kay Senate President Pro Tempore Sherwin Gatchalian.

“Yes, because of the Avelino case may quorum tayo,” sinabi ni Gatchalian.

Ginagamit ng panig ni Gatchalian ang Avelino doctrine bilang batayan ng posisyon na maaaring bumuo ng quorum ang 12 senador kung 23 senador lamang ang itinuturing na available.

Kinukuwestiyon ito ng kampo ni Cayetano at iginiit na kailangan ang 13 senador para sa quorum at leadership actions sa 24-member Senate.

Sa petisyon sa Supreme Court, humiling umano ang Cayetano bloc ng status quo ante order upang ibalik ang Senado sa kalagayan nito bago ang June 3 session.

Hinihiling din sa petisyon na ideklarang null and void ang mga aksyon noong June 3 session, kabilang ang pagdedeklara na bakante ang mga posisyon sa Senado at ang paghalal ng mga bagong opisyal.

Dapat idulog sa Supreme Court ang mga isyung may kinalaman sa Konstitusyon, ayon kay Cayetano.

“Sabi po sa ating Philippine Constitution, pag may violation ng Constitution, sa Supreme Court talaga ang punta,” sinabi ni Cayetano.

Kinuwestiyon din umano ng mga petitioner ang paggamit sa Avelino v. Cuenco.

Kinuwestiyon din umano sa petisyon ang pag-upo ni Gatchalian bilang acting Senate President.

“It will also be a lesson to all Senators when it comes to power and restraint and following rules,” sinabi ni Cayetano.

Dapat mas maagang inihain ni Cayetano at ng kanyang mga kaalyado ang petisyon upang mabigyan ang Supreme Court ng sapat na panahon na pag-aralan ang isyu bago ang special session.

“Disgraced ex-SP Cayetano should have done that earlier to give the Court sufficient time to study and rule on the issue now being raised before the Court,” sabi ni Lacson.

Inihain ang petisyon isang araw bago ang special session na ipinatawag ni President Ferdinand Marcos Jr. upang talakayin ang pending priority measures at Commission on Appointments matters.

Maaaring gamitin ang paghahain ng petisyon upang magharap ng panibagong procedural challenge sa special session.

“Is he trying to dig deeper in his bag of dirty tricks to create a scene tomorrow by invoking that pending action by the Supreme Court on his petition, he may still exercise his authority as Senate President?” tanong ni Lacson.

Ayon kay Lacson, hindi dapat payagan ni Gatchalian at ng majority bloc ang panibagong aberya at maaaring mabigatan ang Senate Sergeant-at-Arms kung may tangkang gumawa ng gulo sa sesyon.

Inaasahang dadalo rin ang mga miyembro ng Kamara sa Commission on Appointments matapos niyang makausap ang Speaker nitong mga nakaraang araw.

Inaasahang tatalakayin sa special session ang mga nakabinbing panukala, kabilang ang dagdag na tulong para sa mga naapektuhan ng lindol sa Mindanao, citizenship bills at iba pang priority items.

Ginawa ni Gatchalian ang pahayag habang hinaharap din ng Senado ang Blue Ribbon-linked activity ng Cayetano bloc sa EDSA, na itinuturing ng kanyang panig na hindi awtorisado.

“Niloloko niya ang taong bayan, hindi naman siya (Mike Defensor) senador, at ginagamit niya ang pangalan ng Senado at ng Blue Ribbon Committee nang walang awtoridad. Hindi tama ’yan dahil panloloko ang ginagawa,” sinabi ni Gatchalian.

Nauna nang itinanggi ng Tulfo-led Blue Ribbon Committee ang umano’y hearing at sinabing walang nakatakdang opisyal na pagdinig.

Nakikipag-ugnayan siya kay Sen. Erwin Tulfo tungkol sa posibleng legal steps kaugnay ng anunsyo, ayon kay Gatchalian.

Nauna nang binanggit ni Tulfo ang posibleng usurpation of authority kaugnay ng anunsyo ng umano’y Blue Ribbon hearing sa labas ng Senado.

Sinabi ni Senador Francis “Kiko” Pangilinan na mayroon nang quorum ang Gatchalian bloc sa 12 senador. Sa posibleng pagdalo ni Senador Joel Villanueva sa special session, maaaring umabot sa 13 ang bilang.