NAGPAHIWATIG noong Huwebes ang mga tagausig ng Kamara na maghahain sila ng mas matitibay na ebidensya sa susunod na linggo sa paglilitis sa impeachment laban kay Pangalawang Pangulo Sara Z. Duterte. Gayunman, tumanggi silang magbigay ng mga detalye dahil sa patakarang nagbabawal na talakayin ang mga usaping hindi pa naihaharap sa Senate impeachment court.

Sa Kapulungan ng mga Kinatawan, nagbigay ng ulat tungkol sa unang linggo ng paglilitis at sa mga susunod na testigo para sa Artikulo IV (grave threats o matinding pagbabanta) sina House prosecution legal spokesperson Atty. Benjamin “Jay” Tolosa Jr., Deputy Speaker Francisco Paolo Ortega V ng La Union, Kinatawan ng Lungsod ng San Juan na si Ysabel Maria Zamora, at 1-Rider Party-list Rep. Rodge Gutierrez.

Tinanong si Tolosa kung may ihahain bang “pasabog” ang prosekusyon sa susunod na linggo.

“Meron ho kaming matibay na ebidensya na ilalabas sa susunod na linggo,” ani Tolosa.

Ngunit tumanggi siyang magbigay ng karagdagang detalye, na ipinaliwanag na hindi maaaring talakayin ng prosekusyon ang mga bagay na hindi pa naipiprisinta sa impeachment court.

“Because of the sub judice rule, we cannot talk about matters which were not yet discussed in the impeachment proceedings,” ani Tolosa.

“Kaya hinihiling namin ang inyong kaunting pasensya sa ngayon,” dagdag niya.

Ayon kay Tolosa, maaari lamang pag-usapan ang mga usaping ito kapag naipresenta na ng kanilang mga testigo sa hukuman.

“Pag nailatag na ho ‘yan ng witnesses namin, puwede na natin pag-usapan,” aniya.

Nang tanungin tungkol sa posibleng mga bagong pangyayari sa imbestigasyon ng National Bureau of Investigation (NBI), sinabi ni Tolosa na hintayin na lamang ng publiko ang testimonya ng mga susunod na testigo ng prosekusyon mula sa NBI.

“Hintayin natin ang testimonya ni Director Melvin Matibag at ng isa pang regional director ng NBI,” ani Tolosa.

“Sila ang magbibigay ng testimonya tungkol sa isinagawang imbestigasyon ng NBI kaugnay ng kasong ito,” dagdag niya.

Sinabi naman ni Zamora na nasa paunang yugto pa lamang ang presentasyon ng prosekusyon kaugnay ng Artikulo IV.

“Umpisa pa lang po ito,” ani Zamora.

“Hindi pa po tapos ang pagpresenta ng mga witness patungkol sa Article IV o ‘yung grave threats article,” dagdag niya.

Ayon sa kanya, isa pang opisyal ng NBI ang nakatakdang tumestigo sa susunod.

“Sa mga darating na linggo, mayroon pa po tayong ibang mga testigo. Ang susunod ay inanunsyo na rin, at isa rin siyang opisyal ng NBI—si Attorney Lotoc—na ihaharap natin sa Lunes,” ani Zamora.

Hinikayat din ni Zamora ang publiko na patuloy na subaybayan ang paglilitis.

“Sana po ay patuloy na subaybayan ng ating publiko ang paglilitis sa ating Pangalawang Pangulo dahil marami pa po tayong mapupulot na kaalaman dito,” aniya.

Para sa panel ng mga tagausig ng Kamara, malinaw ang kanilang mensahe: ang unang testigo ay nagsilbing pundasyon ng kaso, malayo pa sa pagtatapos ang presentasyon ng Artikulo IV, at ang mga susunod na ebidensya ay ihaharap sa hukuman sa susunod na linggo.