NAPANSIN ng House prosecution panel ang mga paulit-ulit na sagot ni dating Office of the Vice President (OVP) special disbursing officer Gina Acosta sa impeachment trial ni Vice President Sara Z. Duterte na anila’y kapansin-pansing naiiba sa kanyang testimonya noong House inquiry.

Gayunman, nag-ingat ang prosecution na direktang sabihing “na-coach” o binigyan ng scripted na sagot si Acosta habang nagpapatuloy ang kanyang pagharap sa Senado bilang impeachment court.

Ayon kay House prosecutor at Bukidnon Rep. Jonathan Keith Flores, tila may isang paulit-ulit na linya sa mga sagot ni Acosta na para bang “minemorize” na niya ito.

“Hindi ko naman siya sasabihing na-coach. But if you can observe, paulit-ulit iyong isang phrase lang na answer niya na parang na-memorize na answer,” ani Flores.

Sinabi ni Flores na personal niyang nasaksihan ang testimonya ni Acosta noong 2024 sa House Committee on Good Government and Public Accountability, kung saan tinalakay nito ang naging papel niya sa paghawak ng confidential funds ng OVP.

Ayon sa mambabatas, malaki ang pagkakaiba ng paraan ng pagsagot ni Acosta noon kumpara sa kanyang testimonya sa impeachment trial.

Sa impeachment trial, paulit-ulit umanong sinasabi ni Acosta na umasa siya kay Col. Raymund Dante Lachica dahil sa kanyang kaalaman sa seguridad, pagpapatupad ng confidential operations at pagbibigay ng mga utilization record.

Sinabi ni Flores na lumilitaw ang parehong sagot kahit iba-iba ang itinatanong tungkol sa pagpaplano, paglalabas ng pondo, beripikasyon at liquidation ng confidential funds.

“Ngayon, unfortunately, everyone can observe naman: she gives the same answer for every question,” ani Flores.

Sumang-ayon naman si House prosecution panel spokesman at dating Surigao del Norte Rep. Ace Barbers sa obserbasyon ng private prosecutor na si Atty. Amando Virgil Ligutan na may ilang sagot ni Acosta na tila **umiwas sa direktang pagtugon** sa mga tanong.

“Hindi naman siguro totally coached. But sa tingin ko, tama iyong observation ni Atty. Ligutan na evasive,” sabi ni Barbers.

Ipinaliwanag ni Barbers na maaaring maging paraan ng pag-iwas sa isang tanong ang paulit-ulit na pagkapit sa iisang linya ng sagot, bagama’t hindi niya sinabing alam niya kung paano inihanda ni Acosta ang kanyang testimonya.

“The best way to evade a question is to stick with a line,” ani Barbers.

Ayon kay Barbers, mas natural at kusang sumagot si Acosta noong House inquiry, kaya kapansin-pansin umano ang pagbabago sa kanyang kilos at paraan ng pagsagot sa impeachment trial.

Sinabi nitong mahalagang obserbahan kung direktang sinasagot ni Acosta ang bawat mahalagang tanong na inihaharap sa kanya.

Nang tanungin kung bakit mas maingat umano ngayon si Acosta sa kanyang mga sagot, nagbigay si Barbers ng posibleng paliwanag ngunit hindi ito iniharap bilang akusasyon.