NAKAPAGTALA ang Metro Rail Transit-3 ng bagong ridership record sa nakaraang dalawang taon at pitong buwan.

Ayon sa MRT-3 noong Biyernes, Enero 20 ay umabot sa 396,345 pasahero ang naisakay nito. Ito ang pinakamataas na bilang ng mga sumakay na pasahero mula noong Hunyo 1, 2020 o nang magbalik ang operasyon ng railway system matapos itong pansamantalang isara dahil sa pandemya.

Bago ito, ang rekord ay 389,036 pasahero na naitala noong Hunyo 2022.

Iniuugnay ang pagdami ng pasahero sa mas maayos na serbisyo ng MRT-3 matapos ang isinagawa ritong rehabilitasyon na natapos noong Disyembre 2021 na nagbigay daan upang maiakyat sa 60 kilometro bawat oras ang bilis ng mga tren.