BINIGYANG-DIIN ni House prosecution spokesperson – impeachment adviser at dating Surigao del Norte Rep. Robert Ace S. Barbers na hindi na kailangan pang maging “Superman” para malinawan ang katotohanan tungkol sa paggamit at liquidation ng confidential funds ng Office of the Vice President (OVP) at Department of Education (DepEd) kasunod ng testimonya ng isang state auditor sa impeachment trial ni Vice President Sara Z. Duterte.

Ayon kay Barbers, nagbukas ng seryosong mga tanong ang testimonya ni Commission on Audit (COA) auditor Xylene May Del Campo hinggil sa mga liquidation record na isinumite ng OVP at DepEd.

Sinabi umano ni Del Campo na may mga pagkakataong isang Special Disbursement Officer (SDO) ang nakatalang naglabas ng confidential funds para sa maraming recipient na nasa magkakaibang bahagi ng Luzon, Visayas at Mindanao sa iisang araw.

Wala rin umanong karagdagang supporting documents na isinumite sa COA upang ipakita kung paano at saan aktuwal na isinagawa ang mga naturang disbursement.

“Paano maisasagawa ng isang ordinaryong tao ang personal na paghahatid ng confidential fund payments sa mga recipient na nakakalat sa iba’t ibang pangunahing isla ng bansa sa iisang araw?” tanong ni Barbers.

Ayon kay Barbers, hindi kailangan ng “Superman” upang makita ang tila imposibilidad ng mga nakasaad sa liquidation records.

“Kung ipinapakita ng liquidation documents na isang SDO lamang ang personal na nagsagawa ng lahat ng disbursement sa iisang araw, natural lamang na kailangan itong masusing suriin,” dagdag ni Barbers.

Ipinaliwanag naman ni Del Campo na nakabatay ang audit ng COA sa mga liquidation report, acknowledgment receipt, certification at iba pang supporting documents na opisyal na isinumite ng mga ahensya.

Hindi umano sinabi ng auditor na independiyenteng napatunayan ng COA ang bawat intelligence operation na pinaggamitan ng mga pondo, alinsunod sa umiiral na audit rules para sa confidential funds.

Gayunman, sinabi ni Barbers na ang testimonya at mga dokumentong iniharap sa impeachment court ay naglalabas ng mahahalagang katanungan hinggil sa regularidad ng proseso ng liquidation.

Binigyang-diin ng mambabatas na hindi nangangahulugan na maaaring mawala ang pananagutan dahil lamang confidential ang isang pondo.

“Ang confidential funds ay hindi exempted sa accountability dahil lamang confidential ang mga ito. Pondo pa rin ito ng bayan,” ani Barbers.

Ayon sa kanya, bawat pisong nagmumula sa buwis ng mga Pilipino ay kailangang maayos na maitala, masuportahan ng wastong dokumentasyon at ma-account alinsunod sa batas at mga regulasyon ng COA.

Patuloy umanong maghahain ang House prosecution ng mga testigo at dokumentaryong ebidensya upang matulungan ang mga senator-judge na matukoy kung nasunod ang mga pamantayan ng Konstitusyon tungkol sa pananagutan at tiwala ng publiko.

“Ang pera ng bayan ay hindi dapat ituring na pribadong pera, at ang katotohanan tungkol sa paggamit nito ay dapat manaig,” pahayag pa ni Barbers.