IPINAKILALA ng Department of Tourism (DOT) ang P-pop sensation na BINI bilang mga pinakabagong tourism ambassadors nito.

Kinuha ng ahensya ang grupong lumikha ng kasaysayan sa industriya ng musika upang tumulong sa pagpapakita ng makulay na kultura, iba’t ibang destinasyon, at world-class na hospitality ng Pilipinas sa mga lokal at internasyonal na madla.

Kasunod din ng anunsyong ito ang paglulunsad ng bagong kampanya para sa domestic tourism na “Discover More to Love,” na nag-aalok ng mahigit isandaang libong travel dealsss mula sa mga hotel, tour operator, at airline partners upang hikayatin ang mas maraming Pilipino na tuklasin ang mga destinasyon sa buong bansa at palakasin ang domestic tourism ng Pilipinas.

Noong Biyernes (Hulyo 3), nagsagawa ng courtesy visit ang sikat na Pinoy Pop (P-Pop) girl group na binubuo ng walong miyembro kay Tourism Secretary Dita Angara-Mathay sa DOT Central Office sa Makati City.

Binigyang-diin ng pinuno ng turismo na ang hakbang na ito ay bahagi ng patuloy na pagsisikap ng Kagawaran na makipagtulungan sa mga kilalang talento ng Pilipinas sa buong mundo upang isulong ang turismo ng bansa. Tugon din ito sa lumalakas na panawagan ng publiko na isali sila sa industriya ng turismo matapos ang kanilang napakalaking tagumpay.

“Minsan, ang mga kabataan ay may kakayahang mag-udyok sa isang buong henerasyon, pamahalaan, o burukrasya na tahakin ang isang partikular na direksyon na makakaabot sa mas malawak na publiko—at napatunayan nating tama ang ating naging desisyon. Isang mahalagang natutunan mula sa unang pagpupulong na ito ay ang katotohanang ang bawat kabataang babae ay kumakatawan sa isang lalawigan o bayan. Batid na batid nila ang mga kaakit-akit na katangian ng kani-kanilang bayan. Sa tingin ko ay napakasariwa at makabuluhan ng kanilang mga ideya, at iyan ang maiaambag ng bawat isa sa kanila sa sektor ng turismo,” pahayag ng pinuno ng turismo sa isang panayam.

Ayon kay Secretary Mathay, ang inisyatibong ito ay isang pamumuhunan sa ‘soft power’ ng pop culture at bahagi ng mas malawak na estratehiya ng DOT na gamitin ang lawak ng naaabot at impluwensya ng mga kilalang artistang Pilipino sa buong mundo upang isulong ang turismo.

“Hangad namin ang isang pangmatagalang ugnayan; hindi kami naghahanap ng panandalian lamang. Sapagkat ang pangmatagalang ugnayan ang tunay na nagbibigay ng malalim na epekto.

Ipinapakita nito ang isang seryoso, sustenable, at pangmatagalang pagtutulungan—handa kaming makipag-ugnayan sa kanila sa mahabang panahon. Iyan ang aming layunin, at umaasa kaming ganoon din ang nasa isip ng grupo,” dagdag pa ni Secretary Angara-Mathay.

Bilang bahagi ng magiging partnership sa hinaharap, susuportahan ng DOT ang BINI sa pamamagitan ng pagbibigay sa kanila ng mas maraming plataporma upang maipakita ang iba’t ibang atraksyon at karanasan sa turismo ng Pilipinas.

“Kung hilig nila ang pagluluto, sports, o kaya naman ay ang pag-iisip na bumalik sa kanilang mga probinsya at komunidad, susuportahan namin iyon; kahit pa magpunta sila sa ibang bansa, susuportahan pa rin namin sila,” masigla niyang pahayag.

Sa panig naman ng Star Magic, pinuri ng pinuno nitong si Laurenti M. Dyogi ang inisyatiba ng pamahalaan na isulong hindi lamang ang Original Pilipino Music (OPM) kundi pati na rin ang talento at kulturang Pilipino.

“Wala pa kaming pinal na napagkakasunduan, ngunit marami kaming tinitingnang mga posibilidad na hindi sana magiging posible kung hindi nagkusa ang DOT—sa pamamagitan nina Ren at ng Kalihim—na makipag-ugnayan at bumuo ng bisyon para sa isang partnership kasama ang BINI at iba pang nagdadala ng dangal sa mga Pilipino. Kaya naman, ito ang simula ng inaasahan naming pangmatagalang partnership sa pagtataguyod ng turismo ng Pilipinas,” aniya.

Kamakailan, kinilala rin ng Senado at ng Kapulungan ng mga Kinatawan ng Pilipinas ang BINI sa pamamagitan ng isang pormal na resolusyon na nagpupugay sa kanilang mga tagumpay sa antas-internasyonal at lumalaking impluwensya sa pagtatampok ng talentong Pilipino sa entablado ng mundo.

Matapos ang kanilang makasaysayang tagumpay bilang kauna-unahang grupong binubuo ng mga Pilipino na nagtanghal sa Coachella noong Abril, patuloy na isinusulong ng BINI ang lokal na turismo.

Sa isang panayam, ibinahagi ng mga miyembro ng BINI ang kanilang mga paboritong destinasyon sa Pilipinas na nais nilang pasyalan, na nagsisilbing mainam na gabay para sa mga tagahanga na nais maglakbay sa kapuluan. Pinili nina Aiah, Maloi, at Colet ang Batanes; Palawan naman kay Sheena; Bukidnon kay Gwen; Romblon kay Mikha; Siargao kay Jhoanna; at Boracay kay Stacey.