GAPAN CITY–Inaresto ng mga pulis dito ang 42-anyos na pahinante dahil sa dalang 9mm pistol, bala at 10 gramo ng shabu na nagkakahalaga ng P68,000 noong Sabado.

Kinilala ang nahuli na si alyas Ric na nahuli sa tulong ng search warrant na ipinalabas ng executive judge ng Regional Trial Court Branch 87, Gapan City, ayon kay Lt. Col. Wilmar Binag, hepe ng Gapan police.

Ang naarestong suspek at ang mga nakumpiskang ebidensya ay nasa kustodiya na ng Gapan City police para sa kaukulang disposisyon.

“Nakatuon kami sa pagpapaigting ng kampanya kontra iligal na droga at loose firearms na maaaring gamitin sa mga kriminal na gawain,” pahayag ni Nueva Ecija police chief Col. Ritchie Claravall.