Nagpaalala ang Bureau of Corrections (BuCor) sa lahat ng personnel nito na tiyaking ligtas at maayos ang pagkakakustodiya ng kanilang mga baril kasunod ng mga insidenteng kinasangkutan ng mga menor de edad na nakakuha ng armas na pagmamay-ari ng mga nakatatanda.

Binigyang-diin ni BuCor Director General Gregorio Pio Catapang Jr. na dapat nakalagay ang mga baril sa secure na lugar at hindi naaabot ng mga bata o sinumang walang awtorisasyon. Saklaw nito ang pag-iingat ng armas maging sa loob ng bahay o sa mga sasakyan.

Layunin ng direktiba na maiwasan ang aksidenteng pamamaril, hindi awtorisadong paggamit ng baril at iba pang insidenteng maaaring humantong sa pagkasawi.