Inisyuhan ng LTO ng SCO

ISANG viral post sa Facebook page na “Byaheng Manila to Bicol Door to Door” ang nagdulot ng pansin sa Land Transportation Office (LTO).

Isang ginang kasama ang kanyang anak ang sumakay sa Toyota Avanza, na napag-alaman ng LTO na isang pribadong sasakyan, mula Goa Terminal sa Camarines Sur patungong North Caloocan.

Napagkasunduan ang P2,000 para sa direktang paghatid sa kanilang tahanan kasama ang mga gamit. Ngunit sa Cubao sa Quezon City sila ibinaba ng drayber at humiling ng dagdag na bayad. Sinabi nitong hindi kasama ang destinasyon sa napag-usapan.

Dahil sa insidenteng ito, muling nagpaalala si Assistant Secretary Markus V. Lacanilao, ang chief ng LTO: “Ang mga ganitong insidente ay nakakasira sa tiwala ng publiko at labag sa mga patakaran para protektahan ang mga pasahero. Ang colorum na pagbibiyahe, dagdag na singil, at pagtanggi na tapusin ang serbisyo ay hindi makakalusot sa ating mga operasyon. Hinihikayat ko ang mga pasahero na ireport agad ang mga ganitong pang-aabuso.”

Ipinag-utos ni Lacanilao na isyuhan ng show cause order ang may-ari ng sasakyan at drayber. Inatasan silang magsumite ng sworn statement sa Intelligence and Investigation Division (IID) ng LTO Central Office at dumalo sa pagdinig sa Enero 12 para ipaliwanag kung bakit hindi sila dapat parusahan.

Kailangan nilang ipaliwanag ang pagtanggi na tapusin ang paghahatid hanggang sa napagkasunduang destinasyon.

Dapat din nilang sabihin ang dahilan ng dagdag na bayad nang walang paunang pag-uusap, dahil ang pamasahe ay batay sa kasunduan bago sumakay.

Bukod dito, kailangan nilang ipaliwanag kung bakit ginamit ang pribadong sasakyan para sa pagbibiyahe nang walang pahintulot mula sa Land Transportation Franchising and Regulatory Board isang paglabag sa batas na kilala bilang colorum.

Kailangan din nilang sabihin kung bakit hindi dapat suspendihin o kanselahin ang lisensiya ng drayber, na maaaring ituring na “improper person to operate a motor vehicle” kung may patunay ng pagkakamali.

Dapat nilang dalhin ang lahat ng dokumento ng sasakyan sa pagdinig.

Habang iniimbestigahan pa ang kaso, ang Toyota Avanza ay pansamantalang inilagay sa alarm status. Ang lisensiya ng drayber ay sinuspinde ng 90 araw at kailangang ibigay sa LTO bago ang pagdinig.

Pinapaalalahan ang mga nasasangkot na kung hindi sila magsusumite ng paliwanag, ituturing silang hindi makakapagbigay ng kanilang panig, at pagpapasiyahan ang kaso batay sa ebidensiya ng LTO.